Die bestuur van die Evangelische Kirche, die Protestantse volkskerk van Duitsland, het in ‘n rapport aan lidmate voorgestel dat die tradisionele beskouing van die gesin as die saamleef van ʼn man en ʼn vrou en, eventueel, kinders, laat vaar moet word. By die vrystelling van die rapport het die voorsitter, Nikolaus Schneider, gesê dat die Bybel geen rede gee om te dink dat die huwelik ʼn instelling van God is of dat die verbintenis van man en vrou ʼn skeppingsordening is nie. Volgens Schneider is die huwelik ʼn tyd- en kultuurbepaalde verskynsel, en ken die Bybel ook ander samelewingsvorme, soos susters wat saamwoon en mans wat intieme bande met mekaar het. Daarom moet die kerk rituele instel om saamgestelde gesinne, homoseksuele verhoudings en eenouergesinne in te seën. Volgens Schneider moet ‘alle verhoudinge waarin mense hulle aan mekaar verbind, verantwoordelikheid vir mekaar neem en respekvol met mekaar omgaan, kan reken op die steun van die kerk. Die gesin moet nie as norm aanvaar word nie’. Na die bekendstelling van die rapport het Christene én liberale politici hulle kritiek daarop uitgespreek

Michael diener van die Duitse Evangeliese Alliansie het gesê dat die bestuur die Bybel oor die huwelik op ʼn ‘totaal onaanvaarbare en eensydige manier’ uitlê. Volgens hom word die Bybelse getuienis oor die huwelik as skeppingsordening daarmee ter wille van maatskaplike ontwikkelings tersyde gestel. Die bestuur maak hiermee ʼn knieval voor die tydsgees, aldus Diener.

Die president van die Sentrale Komitee van die Rooms Katolieke Kerk in Duitsland, Alois Glück, het in is sy reaksie gesê dat die huwelik nie op een lyn met of gelykwaardig aan ander samelewingsvorme gestel kan word nie. As dit die amptelike standpunt van die kerk word, sal dit die gesamentlike pogings om die gesin polities te beskerm, ernstig bemoeilik.