Die Iranse voorganger Youcef Nadarkhani verwag die doodstraf weens ‘geloofsafval’. ʼn Regsitting sal moet bepaal of die 34-jarige Iraniër regtig Moslem was toe hy hom op 19-jarige ouderdom  tot die Christendom bekeer het. Indien wel, dan wag die strop vir hom.

Nadarkhani is in die herfs van 2009 gevange geneem, omdat hy geprotesteer het teen verpligte Islam-lesse by die skool van sy seuntjies Daniël (9) en Yoël (7). Hy het hom beroep op die grondwetlik vasgelegde reg van godsdiensvryheid. Die eerste aanklag teen hom, naamlik van ongeoorloofde protes is later verander in ‘geloofsafval en evangelisasie onder Moslems’.

In September verlede jaar is Nadarkhani ter dood veroordeel, omdat hy op meerderjarige ouderdom sy rug op die Islam gedraai het. Farwa’s van die Opperste Leier in Iran, bepaal dat ʼn seun wat gebore is uit Moslemouers en tot sy 15e lewensjaar (die grens vir meerderjarigheid) geen ander godsdiens aangeneem het nie, outomaties Moslem is. Omdat Nadarkhani eers op 19-jarige leeftyd Christen geword het, is hy skuldig  aan geloofsafval.

In opdrag van die hooggeregshof moet ʼn plaaslike regbank opnuut ondersoek of Nadarkhani regtig Moslem is. Nadarkhani bestry dat hy ʼn afvallige is. ‘Voor my 19e jaar het ek geen enkele godsdiens aangehang nie’, het hy tydens sy verhoor verklaar. Die owerhede plaas Nadarkhani onder swaar druk om sy geloof te herroep, onder meer deur die veroordeling van sy eggenoot Fatima Pasindedih tot lewenslange gevangenisstraf, verlede jaar Junie. Sy vrou het intussen suksesvol appél aangeteken en is weer vrygelaat.