Naby die Israelse stad Bet Shemesh is ʼn seël gevind waarop ʼn mens en ʼn groot dier afgebeeld is. Die seël dateer uit die elfde eeu voor Christus, en volgens verskillende ondersoekers laat die afbeelding ʼn mens sterk dink aan die verhaal van die rigter Simson, wat op pad na sy geliefde in Timna ʼn leeu doodmaak. Die plek waar die seël gevind is, is nie ver van Tel Batash, die Bybelse Timna, nie.

Die argeoloë, prof. Shlomo Bunimovitz en dr. Zvi Lederman, wat vir die opgrawings verantwoordelik is, wil nie met hulle gevolgtrekkings so ver gaan nie. Hulle stem wel saam dat die seël, in kombinasie met die plek van die vonds en datering daarvan, aandui dat in hierdie streek so ʼn verhaal, oor ʼn held wat met ʼn leeu geveg het, die rondte gedoen het.

Die koerant Haaretz berig dat ander opgrawings, waaronder varkbeendere, in die omgewing van Bet Shemesh bewys dat twee verskillende volke in die elfde eeu voor Christus daar gelewe het. Dit sou moontlik die Filistyne kon wees wat, in teenstelling met die Israeliete, wel varkvleis geëet het.