Aantekeninge van Luther gevind

 

WOLFENBÜTEL — Nuwe handgeskrewe aantekeninge van die kerkhervormer Maarten Luther is in Duitsland gekry. Dit kom uit die tyd toe Luther as ʼn Rooms-Katolieke monnik in Erfurt studeer het, vyftien jaar voordat hy sy 95 stellings wêreldkundig gemaak het. Die aantekeninge is deur die Heidelbergse teoloog Ulrich Bubenheimer ontdek. Volgens Bubenheimer bestaan daar genoeg ander handgeskrewe tekste van Luther waarmee die nuwe vonds vergelyk kan word om die oorspronklikheid daarvan sonder twyfel te stel. Die nuwe ontdekking is in die kantlyn van ʼn kroniek van die die Straatsburgse teoloog en humanis, Jakob Wimpfeling, wat saam met ander werke in een volume gebind is. Die nuwe vonds is van die oudste tekste wat van Luther bekend is. Dit blyk daaruit dat Luther in sy studentejare nog die katolieke heiligeverering gesteun het.