Onder die ou stad in Jerusalem het argeoloë ʼn baie seldsame seël gevind, wat moontlik ongeveer tweeduisend jaar gelede by godsdienstige rituele in die Joodse tempel gebruik is.
Op die seël, wat in die vorm van ʼn munt is, is daar twee Aramese woorde gevind wat ‘rein vir God’ beteken. Volgens argeoloog Ronny Reich van die Haifa Universiteit, gaan dit hier oor ʼn seëlstempel wat dateer uit die periode tussen die eerste eeu voor Christus tot 70 nC, die jaar toe die Romeinse troepe ʼn Joodse opstand verslaan en die tweede tempel verwoes het.
Volgens Reich is dit die eerste keer dat ʼn seël met inskripsie uit daardie periode van die geskiedenis van Jerusalem gevind is. Dit lyk of dié seël ʼn unieke artefak van die godsdienstige rituele in die tempel is. Tot dusver is daar baie min kunsskatte wat ʼn direkte verband met die tempel gehad het, gevind. Vanweë godsdienstige en politieke sensitiwiteite, word argeoloë toegang tot die terrein, waar vermoedelik die tempel gestaan het, geweier.
Reich is van mening dat die seëlstempel gebruik is om goedkeuring te gee aan voorwerpe soos olie of ʼn dier wat geoffer is. Verskeie materiale wat deur die tempelpriesters gebruik is, moes aan streng reinheidsvoorskrifte voldoen. Dergelike gedetailleerde voorskrifte is in die Bybel, die Mishna, en ander Joodse tekste beskryf. Daarin word ook die gebruik van soortgelyke seëls genoem.
Op grond van dieselfde tekste is die Duitse Argeoloog, Robert Deutsch van mening dat hierdie seël nie as stempel gebruik is nie. Volgens hom moet ons eerder dink aan ʼn ontvangs- of ʼn betaalbewys, wat ʼn rol gespeel het by die oorhandiging van offergawes. .