International Christian Concern (ICC) in Washington is ʼn organisasie wat gestig is om Bybels in Noord-Korea te versprei. Meer as 10 000 Bybels is met lugballonne oor die grens gesmokkel.
ICC het ballonne op verskillende oomblikke laat opgaan, sodat die Bybels oor die swaarbewaakte grense van Noord-Korea gesmokkel kon word. Verpakkings van duisend Bybels is aan elk van die lugballonne bevestig.
Die besit van ʼn Bybel word in Noord-Korea verbied. Wie in besit van ʼn Bybel gevang word, loop die risiko van ʼn eenrigtingsreis reis na ʼn konsentrasiekamp. ʼn Gedeelte van die Bybels in Noord-Korea is deur weermagslede gekonfiskeer. Hulle verhandel die Bybels op die swart mark. Vanweë hulle seldsame beskikbaarheid, het Bybels groot ekonomiese waarde in hierdie land.
Volgens skatting is daar ongeveer 400 000 Christene in Noord-Korea.