Die Chinese huiskerkleier moet twee jaar in ‘n werkkamp deurbring. Die polisie het dié straf – heropvoeding deur middel van arbeid – vir Enhao opgelê. Vir dié strafoplegging is geen bewys van misdaad of aanklag nodig nie. Pastor Shi Enhao (55) is daarvan beskuldig dat hy onwettige samekomste georganiseer het. Enhao het ‘n groot huiskerk van ‘n paar duisend lede, wat in klein groepe op verskeie plekke in die stad Suqian saamkom. Enkele maande gelede is ‘n huiskerk in Shouwang deur Chinese polisie uit die gebou verwyder. Die gemeente kom nou in die buitelug bymekaar, met gevolglike arrestasies van lede. Kritici van daardie besluit was van mening dat groot huiskerke moet opsplits en in huiskamers bymekaar moet kom. Dit sou konflik met Chinese owerhede vermy. Ander meen dat pastor Enhao se straf bewys dat hierdie strategie geen waarborg is dat die owerhede die huiskerke met rus sal laat nie.