In die jaar 2011 het die byna 8 miljoen Egiptiese Christene die ‘nuwe Jode’ van Egipte geword. Nou word hulle verneder, gediskrimineer en vermoor. En hulle vlug in massas.

Einde verlede jaar het 26 mense byvoorbeeld gesterf toe ʼn vreedsame optog van koptiese Christene in Kaïro wreed versteur is. Die Egiptiese leër met pantservoertuie het onder hierdie optog ingevaar.

Politieke kenner en koptiese Christen Monique Samuel, het ʼn dag later vertel dat die Egiptiese staatstelevisie ten tye van die optog, ‘alle burgers van goeie wil’ opgeroep het ‘om die weermag te help, omdat die Christenhonde besig is om Egipte oor te neem’. Hieruit blyk dat die Christene in Egipte, vir sover dit hulle veiligheid aangaan, niks van hulle eie owerheid kan verwag nie.

Egipte is dus nie meer veilig vir Christene nie. Dit blyk verder uit die selfmoordaanslag wat op Nuwejaarsdag in ʼn vol kerk in Alexandrië uitgevoer is, waartydens 23 Christene gesneuwel het. In Meimaand vorige jaar is ook tallose Christene afgemaai, toe fundamentalistiese Moslems drie kerke in die Egiptiese stad Imbaba aangeval het.

As gevolg van bostaande onluste en vele ander aanslae wat teen Christene en kerke gerig is, sal na verwagting slegs hierdie jaar waarskynlik meer as 250 000 Christene uit Egipte vlug.

Anders as die Egiptiese Jode in 1948, kan die Egiptiese Christene egter nie na ʼn eie Christelike land in die Midde Ooste vlug nie. Na 1948 kon die Egiptiese Jode na Israel emigreer, en so eeue van onderdrukking en diskriminasie agter hulle laat. Die agt miljoen Egiptiese Christene het egter nie ʼn eie Christelike ‘Israel’ nie, en kan dus nie anders nie as om te hoop dat ʼn Westerse regering hulle as vlugtelinge sal huisves.