Die Etiopiese bevolking is verwant aan bewoners van Egipte, Israel en Sirië. Die vermenging met groepe uit die Midde Ooste het waarskynlik so ‘n drieduisend jaar gelede plaasgevind, ongeveer in die tyd toe Salomo besoek is deur die koningin van Skeba. Dit is geskryf  deur  ‘n internasionale span  genetici  na aanleiding van ‘n ondersoek na die genetiese diversiteit in Etiopië. Die land vorm ‘n ‘poort’ waardeur groepe mense Afrika kon verlaat. Dis egter opvallend dat Etiopiërs skaars verwant is aan hulle Jemenitiese bure of ander volke op die Arabiese skiereiland. Meer as die helfte van die ‘Etiopiese DNA’ vertoon ooreenkomste met ander Afrikaanse volke, terwyl  net minder as die helfte baie ooreenstem met die DNA van die Jode, Egiptenaars en Siriërs.. Dit hang nou saam met vroeëre waarnemings dat Etiopiese tale verwant is aan tale wat in die Midde Ooste gepraat word. Ook daardie verwantskap se oorsprong dateer so drieduisend jaar terug.

Buiten die Bybel maak die Etiopiese Kebra Nagast (‘Die glorie van die konings’, uit ongeveer die dertiende eeu) ook melding van die besoek van die koningin van Skeba aan Salomo.  Sy het na bewering ná die besoek ‘n seun van Salomo gebaar, wat die stamvader van die Etiopiese konings geword het.

Hierdie ondersoek is gister in die tydskrif ‘American Journal of Human Genetics ‘ gepubliseer.