Die ateïsme is besig om teen ‘n vinnige tempo die westerse samelewing te verower. Dit is vasgestel in die jongste uitgawe van die Duitse weekblad Der Spiegel.

Terwyl ateïsme vroeërjare amper uitsluitend by ontwikkelde, welgestelde, manlike stadsbewoners voorgekom het, is daar nou sprake van ‘n inhaaltendens by allerhande ander groepe in die maatskappy. Wêreldwyd staan godsdiensloosheid, met sy 1 miljard aanhangers, intussen derde op die ranglys van lewensbeskouings, na die christendom (2,3 miljard) en die islam (1,6 miljard). Oor die algemeen is die meerderheid van die ongelowiges eerder ‘godsdiens-onverskillig’ as fanatiek ateïsties.

Volgens die navorser van Der Spiegel, het die gebrek aan godsdiens ‘n sterk morele invloed op die samelewing. “Mense sonder godsdiens is gemiddeld meer opstandig teen oorlog, doodstraf en diskriminasie. Daarmee saam het hulle minder bedenkinge ten opsigte van buitelanders, homoseksualiteit en dwelms.” Godsdiensloses se moraal word dus gekenmerk deur humanisme en toleransie, waardes wat sterker deur hulle as deur gelowiges uitgedra word.