ADDIS ABEBA – Die Britse argeoloog Louise Schofield vermoed dat hulle die goudmyn van die koningin van Skeba gevind het. As dit waar is, dan bevestig die opgrawings in die noorde van Etiopië dat die koningin uit die Bybel se tyd indrukwekkend ryk was.

The Guardian het onlangs berig dat argeoloog Schofield ʼn enorme ou goudmyn op die Gheralta hoogvlakte ontdek het. Sy hoop om die grootte van die goudmyn in ʼn vervolgondersoek vas te stel. Naby die myn het haar span tempelruïnes en oorblyfsels van ʼn slagveld gevind. Die area van die vonds is geleë binne die gebied van die toenmalige ryk van Skeba, wat uitgestrek was oor Etiopië en Yemen.
Haar eerste aanwysing vir die ontdekking was die vonds van ʼn steen, bykans 6 meter lank, waarop ʼn son en ʼn maan afgebeeld was. Onder die steen het sy ’n inskripsie in die Sabean taal gevind, die taal wat waarskynlik deur die koningin gepraat is. Effens verder het hulle reste van ʼn tempel, waar die maangod vereer is, gevind. Reste van menslike bene het gewys dat daar ʼn oorlog was.

In die Bybel praat die Ou Testament verskeie kere oor skatte soos goud en wierook wat uit Etiopië afkomstig is. Die geskiedenis van die koningin van Skeba, wat die Israelse koning Salomo so 3000 jaar gelede besoek het, is baie bekend. In 1 Konings 10 en 2 Kronieke 9 kan ons lees van die skatryk vorstin wat na Jerusalem reis om Salomo se wysheid te gaan ondersoek. Sy het erken ‘die helfte van u buitengewone wysheid is my nie meegedeel nie’. Die boek Konings gee ʼn opsomming van die geskenke wat sy vir Salomo aanbied. ‘Verder het sy aan die koning honderd-en-twintig talente goud en ʼn groot menigte speserye en edelgesteentes gegee; en daar was nooit soveel speserye as wat die koningin van Skeba aan koning Salomo gegee het nie.’

Ook in ander Bybelboeke word daar oor die kosbare grondstowwe van Etiopië gepraat, byvoorbeeld in Psalm 72:10, Jesaja 60:6, Jeremia 6:20 en Esegiël 27:22.