‘n Protestantse kerk in Bogor, op Wes-Java in Indonesië, is die middelpunt van groot spanning tussen moslim en Christene. Die menseregteafdeling van die Evangelies Gereformeerde Kerk op Papua vra wêreldwye aandag vir die situasie in Bogor. Daar word gevrees dat daar Sondag konflik sal uitbreek tussen kerkgangers en radikale moslims.

Volgens verskeie betrokkenes word die kerk reeds enkele jare deur radikale moslimgroeperings geÏntimideer. Om daardie rede het die owerheid in 2008 besluit om die kerk te sluit en die gebou te verseël. Die gemeente het toe begin om kerkdienste op die kerkplein te hou. Dis deur die moslims as ‘n hernude uittarting beskou. Einde verlede jaar het die Indonesiese hooggeregshof uitgespreek dat die sluiting van die kerk onregmatig was. Tot op vandag het die lokale owerhede geweier om die kerk weer oop te stel. Inteendeel, die plaaslike bestuur het die kerk alle aktiwiteite vir komende Sondag verbied.

Ongehoorsaamheid aan hierdie opdrag, sou volgens ‘n plaaslike bestuurder lei tot anargie in daardie stad.

Volgens die menseregtekommissie was daar sedert 2008 reeds ses aanvalle op die kerk. Christene word opgeroep om die Indonesiese owerheid skriftelik te vra vir die beskerming van die Christene in Bogor, asook vir die heroopstelling van die kerk.