Voor die ingang van die kerk het swaargewapende polisie gestaan, wat elke kerkganger se handsak noukeurig deursoek het. So ʼn ingang het Edwin Baelde, direkteur van die Stigting Die Ondergrondse Kerk, nog nie dikwels meegemaak nie. Afgelope Sondag het hy ʼn kerkdiens in die Nigeriese stad Gombe besoek. ‘By die Christene kan jy die angs vir ʼn aanslag voel en sien’ sê Baelde.
Aan die begin van hierdie jaar was dit Gombe se beurt. Tydens ʼn Bybelstudie op ʼn weeksaand, het gewapende mans van die Islamitiese terreurbeweging Boko Haram, wat hulle ten doel stel om die Noorde van Nigerië van Christene te suiwer, die kerk ingestap en hulle gewere op die Christene leeggeskiet. ‘Ongeveer tien mense het daardie aand gesterf’, vertel Baelde. Hy het die kerkgebou , wat intussen nie meer as sodanig funksioneer nie, besoek, en koeëlgate in die mure en bloed op die Bybels wat nog daar rondgelê het, gevind.
Boko Haram het Sondag weer toegeslaan. In Jos het ʼn selfmoord-terroris homself in ʼn motor aan die voorkant van die plaaslike kerk, opgeblaas. Die kerk het ingestort, vyftig mense is gewond, en enkeles het gesterf. In die noordoostelik geleë Biu het ʼn groep gewapende mans op gelowiges tydens ʼn diens losgebrand, waarby een vrou omgekom het. ʼn Week daarvoor het ʼn selfmoordaanslag by ʼn kerk in Bauchi ʼn verdere twaalf mense geëis.
Volgens Baelde dink sy medewerkers en die Nigeriese Christene wat hy ontmoet, dat Boko Haram die aanslae strategies beplan. ‘Daar gebeur meer as net die aanslae wat die nuusberigte haal. Daar is byvoorbeeld doelgerigte aksies op predikante.’ Baelde het ʼn weduwee in ʼn dorp naby Kaduna besoek. Sy het in Maart haar man verloor. Baelde vertel: ‘Gewapende mans het snags hulle huis binnegestorm en geskreeu: ‘Jy is mos die voorganger?’ Vervolgens het hulle hom voor sy vrou se oë doodgeskiet.’
Die aanvalle in Jos het gelei tot wraakaksies van Christene, waartydens enkele Moslems gesneuwel het. ‘ Daar is inderdaad Christene wat terugslaan. Veral jongeres’, sê Baelde. ‘Ander Christene keur dit af. Ek het iemand hoor sê dat mense wat terugslaan nie egte Christene is nie.’
Hoewel die noorde meer Islamities word, vorm die Christene ʼn behoorlike deel van die bevolking. In Gombe is veertig present van die inwoners Christene. ‘Dit gaan dus nie oor ʼn paar mense wat wegkruip nie’, sê Baelde. ‘Ek sien hoe stap hulle met hulle Bybels oor die straat’.
Sy indruk is dat die kerke deur die aanslae nie minder besoek word nie. ‘Die mense glo eerder met nog meer oortuiging. Die weduwee met wie ek gepraat het, het vir my gesê sy kan nie anders as om net op God te vertrou nie.’