ʼn Kandidaat van die universiteit van Leiden is deur die universiteit aangesê om ‘n verwysing na die Bybel uit sy proefskrif te verwyder.
Kandidaat Fred Schonewille hoop om volgende week sy proefskrif te verdedig. In sy proefskrif haal hy die opdrag van Psalm 111 vers 10 in Latyn aan. Op las van die universiteit moes hy dit daaruit verwyder.
Die vertaalde teks lui: ‘Die begin van wysheid is ontsag vir die Heer. Sy roem hou stand vir altyd.’ ‘n Woordvoerder van die universiteit, Caroline van Overbeeke, sê in die universiteitskoerant dat ‘dankbetuigings aan God en huisdiere tot vervelens toe gebruik is’ en daarom is die reëls van die universiteit hieroor opgeskerp.
Schonewille vind die besluit ‘beskamend vir ‘n universiteit wat gewortel is in die godsdiensvryheid’. Hy praat van “ ʼn uiting van sekulêre fundamentalisme”.