ʼn Pakistanse voorganger, Joshua John, is beskuldig van godslastering nadat hy tydens ’n kerkdiens verse oor Jesus uit die Koran met verse uit die Bybel vergelyk het om aan te toon dat Jesus die Seun van God is.

Die voorganger van The Church of God het daarin geslaag om uit die dorp Data Jhatt waar hy sy preek gehou het te ontsnap, maar Moslems uit daardie en ’n naburige dorp het saamgespan om hom gevange te neem. Later dieselfde dag is John deur die polisie gearresteer.

Na bemiddelling deur ’n politikus en die Pakistanse Christelike menseregteorganisasie CLAAS, is die voorganger en sy nege-jarige seun, Calab, uiteindelik vrygelaat. ’n Hoofkommissaris van die Polisie wou ook nie die saak verder voer nie. John moes wel verskoning vir sy aanhaling van die Koran aanbied.

John, wat agtien jaar gelede van die Islam tot die Christendom bekeer is, het verplig gevoel om te vertel oor Jesus, soos Hy in die Bybel geopenbaar is. ‘Ek moes die Woord van God met die mense deel, om hulle te vertel dat die Seun die enigste weg tot die Vader is. Ek het die saad gesaai en dit sal groei en vrugte voortbring’.

Daar moet nou vir John en sy seun ’n wegkruipadres gevind word, omdat hulle nog steeds nie veilig is teen woedende Moslems nie. John se vrou het hom vier jaar gelede verlaat, omdat die gevare van Christenwees vir haar te veel geword het.