Die Iranse vrou Shahnaz Jeizan is weer vry, voorlopig altans. Die eggenoot van Farhad Sabokrouh, pastoor van ‘n Christelike kerk in die Suid-Iraanse stad Ahwaz, is Sondag tydelik op borgtog vrygelaat. Sy is op 23 Desember gevange geneem, toe Iraanse veiligheidstroepe ʼn kerkdiens oorval het.
Volgens die Iranse Christelike nuusagentskap Mohabat News, wat die vrylating van Shahnaz Jeizan bekendgemaaak het, is dit nie bekend waar haar man en twee oudstes van die gemeente hulle bevind, en hoe hulle welstand is nie. Met die aanval op die kerk is alle aanwesiges, asook die kinders, na ʼn polisiekantoor geneem vir ʼn verhoor. Nadat alle persoonlike gegewens bekendgemaak is, mog hulle weer huis toe gaan. Slegs pastoor Farhad Sabokhouh, sy vrou en die twee oudstes is aangehou.
Volgens Mohabat News is die vier Christene tot 28 Desember in ʼn kantoor van die veiligheidsdiens in Anwaz aangehou vir ondervraging. Daarna is hulle van mekaar geskei.
Die Christelike gemeenskap in Iran is ernstig bekommerd oor die omstandighede van die drie. Pastoor Farhad Sabokrouh se gesondheid is sorgwekkend. Die twee oudstes is beide bekeerlinge tot die Christendom vanuit Islam. Davoud Alijani was werksaam as tegnikus by ʼn petrochemiese installasie in die hawe Mahshahr. Na sy bekering is hy verskeie male gedreig en ondervra. Uiteindelik is hy uit sy werk ontslaan. Die aanval op 23 Desember het moontlik verband gehou met die groeiende belangstelling vir die viering van Kersfees deur gaste en nuwe gelowiges. Die owerhede van die Islamitiese Republiek Iran is beslis nie opgewonde oor hierdie groeiende belangstelling nie.