Die stigter van Open Doors, A van der Bijl (84), het onlangs met ‘brother Andrew’ van die Christian Post ʼn onderhoud oor die vervolgde kerk gevoer. Tydens die gesprek is aan Van der Bijl gevra wat hy, in die lig van die vervolgde kerk, van die Amerikaanse megakerke dink.

‘Ek is nie jaloers nie’ sê hy toe, ‘want ek lees in die Bybel niks oor megakerke nie. Die kerk was altyd maar beskeie. Daar was plekke met tien duisende gelowiges wat nie eers ʼn gebou gehad het nie. Nou is daar oral in julle land, of daar nou twintig of honderd lidmate is, kerke nodig, en hoe groter hoe beter’.

God kan sulke kerke gebruik, meen Van der Bijl, ‘maar dan moet die voorganger nie daarop uit wees om ʼn groot naam te verwerf, baie boeke te skryf en baie televisieoptredes aan te bied nie. Dikwels eindig dit in ʼn volslae ramp. In China is daar ook megakerke wat lidmatetal betref, maar hulle het nie mega geboue, mega salarisse, mega roem ens. nie’.

Die Nederlandse evangelis vertel in die onderhoud dat hy eens ʼn gas in die megakerk van die bekende Rick Warren was. Daar kry hy ʼn prys ‘omdat ek oud is en nog steeds vir Jesus volg. Dink jou aan! Hoe kan jy ʼn ou man beloon omdat hy Jesus volg? Julle sou ryk mense in die kerk, wat al hulle geld uitgee aan nog groter bote en nog meer luukses, moes straf. Dit sou die praktyk moes wees. Maar moenie ʼn ou man wat na aan die ewigheid is, beloon omdat hy Jesus volg nie. Ons het almal dié roeping’.

Volgens Van der Bijl is hy nie weer na die megakerk van Warren genooi nie.