ASHDOD – Reste van ‘n versterkte nedersetting uit die tyd van die profeet Jona, is by die hawestad Ashdod in Israel gevind. Volgens die Israeliese Oudheidkundige Diens bewys die opgrawings dat die gebied ten tyde van die profeet, in die agste eeu voor Christus, bewoon is.
Op een van die heuwels van Ashdod is daar mure sigbaar wat tot een meter breed is. Die oorblyfsels wys duidelik op die bestaan van ‘n fort, wat waarskynlik op ‘n strategiese plek gebou is. Volgens die Israelse koerante soos die Jerusalem Post , is dié heuwel die hoogste piek in die omgewing van Ashdod, en styg tot 50 m bo seespieël .
As dit ‘n vesting sou wees, dan is dit baie moontlik dat Ashdod in die sewende en agste eeu voor Christus ‘n besette gebied was. Waarskynlik het die Assiriërs daardie gebied verower. Volgens Sa’ar Ganor, argeoloog in Ashkelon, is dit ook moontlik dat koning Josia van Juda op daardie oomblik die fort beset het.
Volgens Joodse en Islamitiese oorlewering is die profeet Jona in die heuwels van Ashdod begrawe.