Jamie Murray van Blackpool, Brittanje, mag voortgaan om Bybeltekste op die televisieskerm van sy Christelike kafee ‘Salt and Light’ in Blackpool, te vertoon. Die polisie van Lancashire het sy verskoning aangebied, omdat hulle teen die saak opgetree het. Maar nog steeds is die saak nie finaal afgehandel nie.

In sy kafee vertoon Murray (31) deurlopend tekste van die Nuwe Testament – sonder geluid. Verlede maand het daar onverwags 2 polisiemanne binnegeloop en het hom omtrent ʼn uur lank ondervra. Die ondervraging was in verband met ʼn ondersoek na oortreding van die reëls oor belediging. ʼn Vrou het by die polisie gaan kla oor die ‘diep beledigende’ woorde wat sy op die TV-skerm gelees het.

Murray weet nie presies watter Bybeltekste sy vroulike besoeker gegrief het nie, maar hy vermoed dit gaan oor Romeine 1:26-28, waaraan in homoseksuele kringe dikwels aanstoot geneem word.

Op die kafee-eienaar se vraag of die vertoning van Bybeltekste ʼn misdaad is, het die polisiemanne die indruk geskep dat Murray kans loop om gearresteer te word, as hy sou aanhou om ‘aanstootgewende’ materiaal  te vertoon. Murray het besluit om die skerm af te skakel, uit vrees dat hy voor die oë van sy kliënte geboei en gevange geneem sou word.

Hy het gesoek en hulp ontvang van die Christian Institute, ʼn instelling wat regshulp bied aan Christene wat vir hulle regte opkom. Uiteindelik het dit daartoe gelei dat die polisie toegegee het dat hulle, wat die reëlgewing  betref, die saak beslis verkeerd gehanteer het.

Hulle het Murray verskoning aangebied vir die manier waarop hulle die ondersoek aangepak het. Maar hulle weier om verskoning aan te bied vir die ondersoek wat ingestel is. Hulle ontken ook dat hulle die vertoon van Bybeltekste sou verbied het.

Jamie Murray sê dat hy as Christen die verskonings, vir sover hulle aangebied is, aanvaar het en die polisie vergewe het.

Tog is hy van plan om ʼn offisiële klag by die polisie in te dien vir die manier waarop hy behandel is.

Hy sê dat hy dit nie vir homself wil doen nie, maar om te sorg dat dit in die Britse maatskappy moontlik bly om Bybeltekste in die openbaar te vertoon, sonder dat die polisie ingryp.