Lahore - ʼn Christelike menseregte-aktivis wat polisielede aangekla het weens belediging van die Christelike geloof, word nou self bedreig. So word berig deur die persburo AsiaNews.
Wasim Shakir se broer, Fahim, het hom ernstig gewaarsku om die aanklag terug te trek. Shakir het hom egter nie laat ompraat nie. Hy het gehoor hoe polisielede kwetsende opmerkings oor Christene en hulle geloof gemaak het, en het gevolglik ʼn klag ingedien.
Volgens plaaslike bronne het die polisiehoof Riaz, deur middel van Shakir se broer, aangedring om die klag terug te trek. Anders sou Wasim met die polisie te doen kry, het Riaz laat deurskemer. Dit het geblyk dat die dreigement water dra: enkele polisieoffisiers het Wasim self gekontak en het hom laat verstaan dat dieselfde lot hom sou tref as ander aktiviste.
Shakir het opgemerk dat die polisie dikwels kort besoeke in die woonarea aflê, wat nogal intimiderend vir die bewoners was. Die polisie het nie gehuiwer om aan hulle minagting van die Christelike geloof uiting te gee nie. Toe Shakir daaroor gekla het, het die polisie regstreeks teen hom gedraai. Hy het ʼn hofbevel ontvang waarin vermeld is dat hy lede van die polisie aangeval en hulle geskiet het.
Die advokaat wat Shakir se saak moes hanteer, het uit die dossier opgemaak dat geen enkele polisieman deur ʼn vuurwapen gewond was nie. Shakir het ʼn jaar gelede aandag getrek toe hy protes aangeteken het teen die onwettige besetting van landbougrond van Christene, sowel as die skending van Christelike begraafplase in die suidwestelike stad Muzaffargarh.