Volgens ʼn onlangse verslag deur China Aid, ʼn Amerikaanse menseregte beweging, het gevalle van Christenvervolging in China in 2012 met 42% toegeneem. Ten minste 132 gevalle van vervolging, waarby 4,919 Christene  betrek is, is aangemeld.

Die Chinese Kommunistiese owerheid het gedurende 2012 met ʼn hernude aanslag op die sowat 80 miljoen Christene, die meeste waarvan lede is van die duisende huisgemeentes in dié land, begin. Volgens Bob Fu, president van China Aid, pas die Kommunistiese Party reeds sedert 2011’n bykomende taktiek toe om van die huisgemeentes ontslae te raak.

Huisgemeentes word verbied om hulleself “kerke” te noem en word geforseer om hulle by ʼn sogenaamde “Drie-Self Patriotiese Beweging” te registreer. In plaas van arrestasies deur wetstoepassingsowerhede word diensverskaffers en verhuringsagente dan gebruik om “ongeregistreerde” huisgemeentes deur ontsegging van elektriese krag en water en met uitsettings te dwing om hulle deure te sluit. Kerklidmate word ook verhinder om eiendom wat hulle koop in besit te neem. Afgesien van hierdie bedekte aanslag, het die getal kriminele veroordeling weens Christenskap ook sterk toegeneem (volgens die China Aid verslag met soveel as 125%).

Dat die bestaan en toename van die Christendom in China vir die Kommunistiese Party sorgwekkend is, blyk uit ʼn onlangse openbare verklaring deur minister Zhu Weiqun dat “die beginsel dat lede van die Chinese Kommunistiese Party nie aan religie mag glo nie, onverbiddelik gehandhaaf moet word” om “fatale gevolge” vir die Party te voorkom.