Met lande soos Noord Korea, Pakistan en Somalië bo aan die lys van lande waar die ergste Christenvervolging plaasvind, is dit moeilik te begryp dat nie een van hulle die hoogste dodetal van Christene het nie. In 2012 het hierdie skandelike onderskeiding Nigerië te beurt geval. Van alle Christene wat wêreldwyd doodgemaak is, is 70% in Nigerië vermoor.

Meer as 900 Christene is in 2012 in Nigerië vermoor om geen ander rede as dat hulle die Christelike geloof volg nie. Baie slagoffers het die lewe gelaat in die hande van die Moslem ekstremiste-groep, Boko Haram. 128 mense, van wie die meerderheid Christene is, is reeds in 2013 vermoor. Hierdie syfers is vrygestel binne dae na die tweede herdenking van die ergste aanvalle op Christene in die onlangse geskiedenis.

In April 2011, nadat die Moslem aanspraakmaker op die presidentskap van Nigerië beweer het dat die verkiesing wat Goodluck Jonathan, ʼn Christen, aan bewind gestel het, gemanupileer was, het Moslem jeugdiges in die Noorde van Nigerië die strate ingevaar en hulle frustrasie op enige Christen wat hulle teëgekom het uitgehaal. Binne 48 uur is 764 kerke aan die brand gesteek, 204 Christene vermoor, meer as 3,100 Christenbeheerde sake, skole en winkels aan die brand gesteek en meer as 3,400 huise van Christene in puin gelê.