TEHERAN – Iranse owerhede raak bekommerd oor die groei van die aantal huiskerke in die land. As gevolg daarvan neem die druk op Christene toe.

Dit het die woordvoerder van Open Doors, Klaas Muurling, afgelope Woensdag gesê, na aanleiding van die dreigende teregstelling van pastor Yusef Nadarkhani. Volgens hom neem die owerhede in Iran al hoe meer ʼn duidelike standpunt teen die huiskerke in.
In 2010 het die geestelike leier van Iran, Ayatollah Ali Khameini, gewaarsku teen die groei van die aantal huiskerke. In Januarie 2011 het die goewerneur van Teheran meer arrestasies aangekondig, om die ‘korrupte en verwerplike beweging’ van die Christendom teen te werk. Tot Junie is daar inderdaad baie arrestasies uitgevoer. Volgens Muurling is die owerhede die laaste tyd weer ietwat versigtiger en word arrestasies met langer tussenposes uitgevoer.

Verlede week is daar 10 Christene gevange geneem. Op 8 Februarie is ʼn Armeense ouderling, Maasis Mosesian, in Teheran gearresteer. In totaal is daar tussen 250 en 350 Christene in Iran, as gevangenes weens hulle geloof. Op die ranglys van Christenvervolging van Open Doors, beklee Iran die vyfde plek.

Die oorsaak van die owerheid se gealarmeerde houding, is volgens Muurling, die vinnige groei van die Christendom in Iran. Die afgelope vyf jaar het meer as 100 000 Moslems hulle tot die Christendom bekeer.

In Iran lewe daar na raming 460 000 Christene, van wie 350 000 ʼn Moslem agtergrond het. Vanweë hulle geloof word hierdie ex-Moslems baie swaar vervolg. Dis egter vir gelowiges uit die tradisionele Armeense en Assiriese Kerk, net so moeilik om ʼn Christen in Iran te wees.