IZMIR – Alhoewel Turkse Christene en Protestantse kerke in 2011 nog baie gepla is deur geweld, diskriminasie en haat, is hulle meer hoopvol noudat hulle tog verbeteringe sien.

Dit word vermeld in ʼn jaarrapport van ʼn oorkoepelende orgaan van die Turkse Protestantse kerke, wat afgelope week verskyn het.
Die rapport maak maandeliks melding van onreg wat Turkse Christene en kerke die afgelope jaar ondergaan het. Een kerk is met klippe gegooi, ʼn ander kerkgebou is getref deur ʼn vuurwerkbom, terwyl in ʼn derde geval ʼn gewapende man by die kerk ingestap het. Verskeie Christene is beledig en geslaan. In die meeste gevalle van verbale of fisiese geweld teenoor Turkse Christene, is die daders daarvan nie gearresteer nie.

Die feit dat die bou van eie kerke volgens die wet nie toegestaan is nie, word deur die Turkse Christene ervaar as een van die grootste belemmeringe om hulle geloof uit te leef. “Aktiwiteite waartydens ons ons geloof uitlê en uitdra, word deur die owerheid en die samelewing as gevaarlik en onwettig beskou”, aldus die rapport. Die Turkse media bestempel die Protestantse kerke reëlmatig as onwettige organisasies, wat in verbinding met terreurgroepe staan . Turkse burgers moet in hulle paspoorte aandui watter godsdiens hulle aanhang. Volgens die rapport is die kans op diskriminasie baie groter as die woord ‘Christelik’ in jou paspoort vermeld word.
Volgens die Turkse Protestantse kerke is daar tog ook positiewe ontwikkelings sigbaar. So was daar reeds goeie gesprekke met die eerste minister en die ministerie van Godsdienssake. Hulle het beklemtoon dat nie-Moslems dieselfde regte en status as die Moslems het.
Verder is nie-Moslemstudente op skole beter behandel as vorige jare, Ten slotte meld die rapport die hoopgewende feit dat die Turkse voorsitter van die parlement tydens die opstel van ʼn nuwe grondwet al verskeie kere Christene se menings gevra het.