Dit was groot nuus op 27 April 2010, toe die Hong Kong gevestigde Noah’s Ark Ministries International (NAMI), met die beriggewing gekom het dat hulle georganiseerde ekspedisie op die berg Ararat in sy doel geslaag het: reste van die Ark van Noag is volgens bewering, inderdaad gevind. Fisiese bewyse kon egter nie gelewer word nie. Sekulêre media en wetenskaplikes was van mening dat Christelike wensdenkery ook ʼn rol hierin gespeel het. Dit sou nie die eerste keer wees dat reste van die ark deur Christene gevind is nie, verklaar die met-die-Bybel-opgevoede joernalis, Frank Westerman, in sy boek Ararat (2009). Die bekendste speurder na Noag se ark was die Apollo-15-ruimtevaarder James Irwin.

Maar hierdie week het die argeoloog Joel Klenck, direkteur van die Paleontological Research Corporation aan die Harvard Universiteit bekendgemaak dat die gelowige bergklimmers uit Hong Kong moontlik reg is. Hy het die houtkonstruksie wat op die Ararat gevind is, vergelyk met ander vondste, en dink dat die lang uitgestrekte vorm sy herkoms het uit die Epipaleolithicum (Mesolithicum). Klenck skat dat die houtreste, wat op 4200 meter hoogte onder lae sneeu en ys lê, dateer uit ‘n tyd tussen 13 000 en 9600 voor Christus. Die NAMI in Hong Kong het die ouderdom van die moontlike ark bepaal op 4800 voor Christus.

Klenck het self rondgekyk en reste van sipresse en sade van vrugte en groente gevind, wat normaalweg nie op daardie hoogte voorkom nie. Bowendien het geblyk dat die houtkonstruksie van ʼn kamer, ʼn trapkonstruksie en dié van ʼn verdieping, eers later besoek is; voorwerpe en bewerkte klip dui op ʼn laaste besoek in die Bronstyd (3000-1200 voor Christus).

Klenck het ook die omvang van die konstruksie gemeet: 121 meter lank, byna 24 meter breed en minstens 5,8 meter hoog. Hierdie afmetings pas by die Bybelse gegewens van die ark, in Genesis 6:15. Volgens die Bybel was die Ark van Noag 300 el lank, 50 el breed en 30 el hoog. Uitgaande van ʼn el van 45 cm, is dit 135 m lank by 22 m breed by 13 m hoog. Die maatverhoudings van die ark is opmerklik modern: 30:5:3. Dit gee ʼn skip ʼn baie stabiele koers. Reuse tenkskepe word ook volgens hierdie verhoudings gebou.

Volgens Klenck is die plek van ontdekking argeologies in elk geval geen bedrog nie, al sê dit nog nie iets definitiefs oor die ark nie. Hy hoop dat voorwerpe uit die houtkonstruksie via die universiteit in Instanbul sal teregkom by die argeometriese afdeling van die Freie Universität in Berlyn. Turkye behoort die plek vir toeriste ontoeganklik te maak.