Die verbod op die ampsgebed sal die Christendom in Groot-Brittanje marginaliseer, meen Lord William Carey, die voormalige aartsbiskop van Canterbury en hoof van die Anglikaanse Kerk. Die gebed by die opening van parlementsvergaderings sal ‘nooit’ verdwyn nie, het die laerhuis-voorsitter John Bercow gister gesê.

Afgelope Vrydag het ʼn Britse regter verbied dat elke raadsvergadering van die stadsraad van Bideford met gebed geopen word.
Die kwessie is aanhangig gemaak deur ʼn raadslid Clive Bone, ondersteun deur die National Secular Society. Dié kontroversiële besluit sal ‘onvoorstelbare verstrekkende gevolge ‘ hê vir die Verenigde Koninkryk, het die voormalige Anglikaanse kerkleier, William Carey, Saterdag gereageer. Die Christelike geloof sal geleidelik na die rand van die samelewing gedruk word. Die vonnis beteken ook dat weermagkapelane hulle taak nie meer kan uitvoer nie, en dat die eed by die kroning van ʼn nuwe vors afgeskaf word. ‘Die Christendom word die swye opgelê’.

‘Dis ʼn afskuwelike vooruitsig’, het Lord Carey gesê. Dit wil voorkom of gelykheid oor alle ander vryhede triomfeer. Dit vorm ʼn toets vir die demokrasie, hoe ons omgaan met verskille van mening en in die besonder met minderhede.
Die vooraanstaande kerkleier het Christene in sy land opgeroep om hulle stemme te verhef, noudat die vryheid van godsdiens op die spel staan. Carey het die regering opgeroep om die besluit of hulle die ampsgebed wil handhaaf, in die hande van die stadsrade self oor te gee.

Voorsitter John Bercow van die Laerhuis, het gister gesê dat die openingsgebed in parlementêre vergaderings nie sal verdwyn nie.. Hy het daaraan herinner dat die gebruik terugdateer tot 1689, en dat elke poging om aan die eeu-oue tradisie ʼn einde te maak, sou misluk. ‘Die House of Commons het self die reg om te besluit oor sy eie prosedures’.