Amerikaners glo nagenoeg dieselfde as twintig jaar gelede, maar die gedrag wat by hulle geloof pas, het sterk verander. Amerika is besig om verder te ontkerklik.

Dit blyk uit ‘n groot ondersoek van The Barna Group, wat ondersoek gedoen het oor die raakvlak van geloof en kultuur. Dié Amerikaanse groep het vir twintig jaar lank met duisend Amerikaners onderhoude gevoer, om vas te stel wat die gangbare tendens is. Vandag verskyn die laaste van ‘n reeks verslae oor die ondersoek.

Die ondersoekers het ontdek dat die inhoud van wat hierdie Amerikaners glo, skaars verander het. Meer nog: die persentasie wat hulleself ‘wedergebore’ noem, het met vyf persent toegeneem, van 35 persent in 1991, tot 40 persent huidig, terwyl die aantal wat hulleself as ‘Christene’ beskryf, konstant gebly het (84 persent). Dit geld ook vir hulle vir wie die geloof belangrik is vir die daaglikse lewe, asook diegene wat hulleself ‘persoonlik toegewy het aan Christus Jesus’ (beide ruimskoots 50 persent).

Die gedagte dat ‘n alwetende God ons heelal bestuur, word deur steeds minder mense bely. Al hoe minder Amerikaners sien die Bybel slegs as ‘n boek vol van lewenswaarhede en –beginsels.

Die manier hoe Amerikaners aan hulle geloof uiting gee – sê maar hulle geloofsbelewing – het wel drasties verander. Die aantal onkerklikes – volgens Barna se definisie: hulle wat slegs op kerklike feesdae kerktoe kom - het baie sterk toegeneem. In 1991 het ‘n kwart van die bevolking hulleself onkerklik genoem. Tydens hierdie ondersoek het daardie persentasie gestyg na 37 persent.

Amerikaners gaan al hoe minder kerk toe, die aantal reëlmatige kerkbesoeke het met nege persent gedaal vanaf 49 persent twintig jaar gelede, tot 40 persent verlede jaar.

Amerika lees ook al hoe minder die Bybel : 45 % in 1991, 40 % nou. Sondagskoolbesoek het met agt persent, tot vyftien persent afgeneem. Minder as een uit elke vyf burgers van die VS doen vrywillige werk vir die kerk – agt persent minder as twintig jaar gelede.

Volgens George Barna, stigter van die ondersoekspan, is hierdie syfers nie verbasingwekkend nie. Hulle is die vrug van die sekularisasie wat in die sestigerjare begin het. Vanaf daardie tyd het die kerke begin leegloop en het persoonlike Bybelstudie sterk afgeneem. Daardie tendense het deurgewerk.

Die feit dat net so veel Amerikaners hulleself steeds Christene noem, is volgens Barna ‘n relatiewe gegewe. In die noordweste van die land het die aantal mense wat hulleself identifiseer as Christen, sterk toegeneem, terwyl die neiging in die middelweste – tradisioneel ‘n Christelike gebied – afwaarts neig. Die ondersoeker ontken dat dit veral jongmense is wat hulle kerkbesoek afskeep. Die toename van die groep onkerklikes word toegeskryf aan die sogenaamde ‘babyboomers’, die groot groep mense wat na die Tweede Wêreldoorlog gebore is.