Die Australiese regering het onder druk van proteste, die datum opgeskuif vir die verbod vir onderwysers en skrywers van geskiedenisboeke om Jesus Christus se geboorte te gebruik as meetpunt vir die jaartelling.

Australiese onderwysinstellings het gehoop om met ingang van die nuwe jaar die huidige terme Before Christ (BC, voor Christus) en Anno Domini (AD, in die jaar van die Here) te laat vervang met Before Common Era (BCE, voor die gewone tydberekening) en Common Era (CE, gewone tydberekening). Volgens die onderwysinstellings is die afkortings BCE en CE reeds in gebruik in die wetenskaplike wêreld, en moet dit nou ook maar elders gebruik word. Maar duidelik het hulle nie rekening gehou met die moontlikheid dat hulle plan soveel teenkanting sou kry nie. Christene beskuldig die onderwysoutoriteite van ‘Christelike suiwering’. In die koerant The Daily Telegraph, het die Anglikaanse aartsbisskop van Sydney, Peter Jensen, die voorgenome verandering veroordeel as ‘uit ‘n intellektuele oogpunt absurde poging om Christus uit die menslike geskiedenis weg te skryf’.

Fred Nile, politikus en metodistiese predikant in New South Wales, het gepraat van ‘ ‘n absolute skande’ en  ‘ die definitiewe belediging’ van Australiese Christene. En Christopher Pyne, onderwyswoordvoerder van die opposisie, noem die voorstel ‘n kniebuiging vir politieke korrektheid, waarmee Australië sy westerse, judeo-christelike tradisie min of meer ontken.

Die invoering van die nuwe terminologie is uitgestel tot ‘n later datum.