Twee Christelike voorgangers in Pakistan het besluit om onder te duik na beskuldigings van godslastering. Vier Moslem-geestelikes wil hulle aankla weens belediging van die profeet Mohammed.

Die evangeliese biskop Pervaiz Joseph en ds. Baber George van die Volle Evangeliegemeente in Pakistan (FGA) is alreeds sewe jaar betrokke by ʼn dialoog tussen Moslems en Christene in die Islamitiese Pakistan. Beide het verlede maand ʼn byeenkoms oor godsdienstige verdraagsaamheid bygewoon.

Toe hulle die misbruik van die omstrede Godslasteringswet in Pakistan aan die kaak stel, het hulle vier Islamitiese gespreksgenote dit nie met dank aangeneem nie. Die Moslems het die Christelike voorgangers daarvan beskuldig dat hulle die profeet Mohammed beledig het. Hulle het dit egter ten sterkste ontken.

Hierna het die beide Christene dreig-telefoonoproepe van verskeie Islamitiese instansies ontvang, onder wie die International Peace Council for Interfaith Harmony (IPCH). Vooraanstaande Moslemgeestelikes het verklaar dat hulle die tweetal op grond van die Godslasteringswet sou aankla. Sowel die biskop as die predikant het besluit om met familielede onder te duik. Ook ander Christelike voorgangers is na bewering telefonies met die dood gedreig.

ʼn Ander Christelike gesin is Dinsdag in Sargodha in hulle huis oorval. ʼn Groep radikale Moslems het die gesinslede mishandel, hulle besittings verniel en hulle beveel om so gou as moontlik pad te gee. ‘Ons strewe na ʼn suiwer Islamitiese Pakistan’, het die waarskuwing gelui.

En in Quetta is Woensdag ʼn Christelike voorganger koelbloedig op straat vermoor. Jameel Sawan het al eerder doodsdreigemente ontvang, omdat hy gepleit het vir aanpassing van die Godslateringswet. Hoewel die owerhede hom polisiebeskerming belowe het, is die predikant Woensdag na ʼn gebedsdiens aangeval: By ʼn kruispunt het drie manne hom aangehou, hom aangespreek op sy verset teen die wet, en hom daarna doodgeskiet.