Om iemand in die hospitaal te besoek is nie so eenvoudig nie. Dit is eintlik iets wat ons liewers vir die predikante laat. ’n Mens voel sommer in die algemeen al ongemaklik in ’n hospitaal, en dan is dit ook nog moeilik om te weet hoe om teenoor die pasiënt op te tree. Die hoofsaak, en wat ’n mens altyd ingedagte moet hou, is dat jy daar is om te bemoedig en vertroos in die Here. Dit is uiteindelik wat aan die pasiënt vrede en hoop sal gee, en aan God alle eer.