Om iemand in die hospitaal te besoek is nie so eenvoudig nie. Dit is eintlik iets wat ons liewers vir die predikante laat. ’n Mens voel sommer in die algemeen al ongemaklik in ’n hospitaal, en dan is dit ook nog moeilik om te weet hoe om teenoor die pasiënt op te tree. Die hoofsaak, en wat ’n mens altyd ingedagte moet hou, is dat jy daar is om te bemoedig en vertroos in die Here. Dit is uiteindelik wat aan die pasiënt vrede en hoop sal gee, en aan God alle eer.

Ek het ’n paar riglyne raakgeloop wat ons kan help hoe om hierdie doel te bereik. Dit is nie volledig nie (julle kan gerus nog voorstelle maak), maar ek dink dat dit sal help om hierdie moeilike en tog waardevolle liefdesdiens te verrig.

· Gebed is dikwels meer effektief as mini-preke. Berei voor vir hierdie gebed! As dit nodig is, maak selfs ’n paar aantekeninge wat jy kan saamvat.

· Om goed en met sensitiwiteit te luister, beteken in hierdie situasies dikwels meer as om self die hele tyd raad en advies te wil gee. Betoon empatie.

· In sulke omstandighede word daar dikwels oor sensitiewe en vertroulike sake gepraat. Beskerm jou naaste en hou dit so veel as moontlik vir jouself.

· Praat oop en eerlik – die waarheid in liefde. Mense in sulke omstandighede het dikwels nodig om oor lewensegte vrae te praat.

· Siekte en hospitalisasie bring ook soms ernstige geestelike sake na vore. Praat eenvoudig oor wie die Here vir die pasiënt wil wees, en nie oor jou eie lewenservaring nie.

· Bring ‘n paar kort besoeke in plaas van een lang en uitputtende een.

· Lees bekende gedeeltes uit die Skrif. Dit is nou juis die tyd om aan die bekende waarhede te herinner en dit te bevestig.

· Hou ook die ander mense in die saal in ag. Wys belangstelling in hulle, en dra hulle ook op in die gebed.

· Onthou, Christus is die hoogste bewys en uitdrukking van God se ontferming en troos. Ons kan nie ander red nie. Net Christus is die Verlosser! Wees net 'n instrument van Hom en moenie self probeer verlos nie.