Hier volg 'n kort artikel van M Janssens (Nederlands Dagblad): Paul Schnabel was verlede naweek baie duidelik oor hierdie saak. ‘Oor aborsie is daar regtig niks nuuts om te vermeld nie’. Dit beweer hy na aanleiding van ʼn onlangse proefskrif in Nederland. In daardie proefskrif word die ontwikkelings ten opsigte van die aborsiewetgewing in 32 Europese lande onder die vergrootglas gehou. En wat blyk? ‘Aborsie is nie meer ʼn aktuele saak nie’ moet Schnabel vasstel. Die meeste lande voer ʼn liberale beleid, waardeur aborsie onder spesifieke voorwaardes toegestaan word. In sommige lande word nog ʼn poging aangewend om bestaande reëls effens te verskerp, maar meesal sonder resultaat. Selfs die Nederlandse kabinet met twee Christelike partye, was nie in staat om iets aan die aborsiewet te verander nie. Tog het aborsie ’n tydjie gelede weer die pers gehaal. In die eerste plek deur die debat of ʼn pasgebore baba met ʼn gesplete rug pyn kan voel. En dan vervolgens deur die bisarre pleidooi om ook ‘aborsie na geboorte’ toe te laat. Redes wat aanleiding kan gee tot aborsie kan dalk eers na geboorte ontdek word, beweer twee etici in die Journal of Medical Ethics. In hulle redenasie gaan hulle uiters rasionalisties te werk. Nie slegs ernstige lyding nie, maar ook sosiale redes, soos ʼn egskeiding, wanneer ʼn kind ongewens is, sou rede kon wees om ʼn pasgebore baba te moet doodmaak. ʼn Pasgeborene en ʼn embrio is wesentlik dieselfde, omdat beide nog nie persone is, in dié sin dat hulle al ʼn selfbewussyn het nie. Alles wat ʼn rede tot aborsie kan wees, behoort ook ʼn rede te kan wees vir ‘aborsie na geboorte’, aldus die kille redenasie. Die betoogtrant van hierdie ‘etici’ wys duidelik hoe ver iemand kan afdwaal as die lewe slegs op rasionele wyse benader word. Die voorstel kom al hoe nader aan die praktyk in die Romeinse Ryk, toe vaders hulle pasgebore kinders mog doodmaak as hulle hul nie wou aanvaar nie. Wie aan die lewe slegs waarde heg vanweë ʼn aanwesige bewussyn , beland deur middel van gevoellose redenerings by gruwelike gevolgtrekkings, wat deur die meeste mense as verregaande ervaar word. Hoe anders is die Christelike uitgangspunt dat die lewe sinvol is, nie net vanweë die waarde wat iemand self daaraan heg nie, maar ook vanweë die herkoms en die doel daarvan. Die geskape werklikheid het waarde en is sinvol, vanweë sy ontstaan , sy bestaan en sy bestemming - so sien die Christen dit, in navolging van die kerkvaders wat hulle teen die Romeinse praktyke gekeer het. En vir wie tog alte graag logies wil redeneer: in die etici se betoog is embrio en pasgeborene moreel gesien, gelykwaardig. Dan is dit mos redelik om die embrio met dieselfde toewyding te behandel as waarmee die gesonde verstand ook pasgebore babatjies verwelkom? Aborsie is behoorlik aktueel.