Onlangs het ek gelees dat 75-90% van alle mense wat tot geloof kom (en ook werklik lewende lidmate van ’n kerk word), deur die weg van ‘vriendskap-evangelisasie’ tot bekering gekom het. Vriendskap-evangelisasie wys dan op die feit dat daar werklike kontak (verhouding) tussen mense was. Ons kan bv dink aan bure, vriende, kollegas ens. Alle ander vorme van evangelisasie deur gemeentelede (deur-tot-deur, Bybelverspreiding, Sondagskool ens) het aansienlik minder resultate gehad.

Natuurlik kan ’n mens statistieke op allerlei maniere laat buikspreek, maar hierdie persentasie-verskille is hoog. En dit hoef ons ook nie te verbaas nie. Meeste van die evangelisasie-metodes vra iets van my, ’n klein deel van my. Vriendskap-evangelisasie skakel my hele persoon in. Dit praat nie slegs oor wat die evangelie vir die ander kan beteken nie, maar dit maak sigbaar wat die evangelie werklik vir myself beteken.

In die hele Skrif word duidelik dat evangelisasie nie slegs ’n aspek van ons lewe is waaraan ons so nou en dan kan aandag gee nie. Evangelisasie is nie ’n knoppie wat ons aan en af kan sit nie. Evangelisasie is nie om buite my ‘gewone’ lewe ook nog so nou en dan iets vir die Here te gaan doen nie. Die uitdra van die evangelie kan nooit losgemaak word van my hele lewe voor die Here nie. 

Die weg wat God ook by die evangelisasie wil seën, is dat die evangelie by ons leef, dat die lewe vir ons Christus geword het, dat my hele lewe gekleur word deur wie God is. By meeste van die ander vorme van evangelisasie kan ’n mens nog bietjie wegkruip as gevolg van die onpersoonlike vorm van die tipe evangelisasie. By vriendskap-evangelisasie word my lewe ’n oop brief van Christus deur die Gees aan die wêreld rondom my (vgl 2 Kor 3). Ja, en al is dit met groot en baie swakhede, by hierdie vorm van evangelisasie word die krag van God se Woord onderstreep deur die sigbaarheid daarvan in my lewe. In my lewe word sigbaar dat God leef en konkreet in ons menslike wêreld inkom. God se liefde vir verlore sondaars is eg!

In persoonlike omgang met ander mense kan die evangelie baie meer direk, baie konkreter, baie dieper in mense se lewens inkom. Dit is dan nie slegs interessante inligting wat met ’n vriendelike versoek uitgedeel word nie, maar dit word ’n oortuigde en kragtige pleidooi op die lewe van ons naaste: Laat julle met God versoen!