Die advertensiewese is die laaste tyd gereeld in die spervuur, veral die mees onlangse ENB-advertensie wat onttrek is op aandrang van die ANC. En toe kom die volgende advertensie waar jy vir jou baas moet lieg en die een wat dit die beste doen, word beloon met ‘n paar duisend rand- met die komplimente van Absa (Sien Beeld, 30 Januarie 2013).

Dié Absa-veldtog is op 28 Januarie geloods oor verskeie radiostasies, waaronder RSG, met die doel om voorafbetaalde lugtyd deur Absa se selfoonbankdiens te adverteer. Niks dus fout met die produk/diens wat geadverteer is nie. Die kruks: deelnemers moes inbel en “wit leuens” vertel om aan hul baas te verduidelik hoekom hulle ‘n uur laat is vir werk. In ‘n ligte luim kon hulle dan vertel hoe presies hulle hul base ‘n rat voor die oë sou draai, met die wenner wat wegstap met R3 000 as beloning, en nog R1 000 as hy/sy ‘n Absa-kliënt is. Nogals ‘n aardige bedraggie as beloning vir die beste “wit leuen”.

Hierdie advertensie het veral kritiek van die AGS en NG-kerke ontlok. Sekere kerke meen dat die vertel van leuens nie ‘n ingeburgerde praktyk mag wees/word nie en dat, waar integriteit ter sprake is, die tipe van bemarking nie goedgekeur kan word nie. Dit is goed dat kerke wel hul stem begin dik maak om ‘n opinie te lewer, veral in die tyd waar die kerk lyk of sy haar stem verloor het. Maar, waar is die ander kerke? Waar is die gelowiges wat sê dat sulke advertensies, al is dit veronderstel om snaaks te wees, nie ooreenstem met wat ons in die Bybel leer nie?  Waar is lidmate wat saam staan en eis dat valse propaganda wat teen die Bybel is nie meer geduld sal word nie? Hierdie is slegs een voorbeeld, in hoeveel advertensies word die Here se naam nie ydellik gebruik nie, word daar misbruik van die vroulike liggaam gemaak nie, word daar gespot met die Christendom en God nie?

Ons as gelowiges moet saamstaan om te veg vir wat volgens die Bybel reg, eerlik en goed is. Hiermee word nie bedoel om wapens op te neem nie, hiermee word bedoel om ons lig te laat skyn in ons gemeenskap en land op die manier wat die Bybel ons leer. Deur die manier wat ons hierteen staan kan ons ongelowiges laat sien hoe die Here in ons werk, wat deel is van ons evangelisasiewerk in die koninkryk van God.

Lydia van der Kooy