Stigting Die Ondergrondse Kerk (SDOK) meld dat daar minstens negentig Christene die afgelope tyd in Eritrea gevange geneem is. Ses van hulle is intussen blykbaar vrygelaat. Onder die gearresteerde Christene is daar ‘n groep van 26 studente van ‘n tegniese skool. SDOK is bevrees dat die gearresteerde Christene na die berugte Mitire-gevangenis oorgeplaas is. Dis ‘n afgeleë gevangenis in die noorde van Eritrea, en berug vir sy martelmetodes. So word gevangenes dae lank in metaal skeepshouers opgesluit. Oordag kry hulle skaars vars lug vanweë die brandende hitte, en snags is dit yskoud. Luidens die organisasie  wil die owerheid  hulle op so ‘n manier dwing om hulle geloof af te sweer. Sedert 2002 word daar in Eritrea slegs nog vier geloofsrigtings deur die owerheid erken: die Islam, die Rooms-Katolisisme en twee strominge binne die protestantisme, naamlik die Eritrese ortodoksie en die Lutheranisme. Alhoewel die regering van president Afiwerki dit ontken, word Christene van ander rigtings vervolg, en is daar tans nagenoeg drieduisend Eritrese Christene in aanhouding.