Saoedi-Arabië wil ’n groep Ethiopiese Christene, wat reeds in Desember gevange geneem is, dwing om hulle tot die Islam te bekeer.
Die Saoediese owerhede het ʼn vroulike imam na die gevangenis gestuur om die 37 Christene tot die Islam oor te haal. ‘Sy het die Christendom beskimp, neerhalende opmerkings oor die Bybel kwytgeraak en beweer dat die Islam die enigste ware godsdiens is’ aldus een van die vroulike gevangenes wat telefonies met ʼn woordvoerder van die ICC gepraat het. Sy het ook gesê dat die groep Christenvroue hulle Christelike geloof nie wou verloën nie. ‘Ek was so beledig deur haar valse lerings’ aldus die vrou.
Die groep is al sedert 15 Desember in die gevangenis in Jeddah, omdat hulle ʼn gebedsbyeenkoms in ʼn privaatwoning gehou het. Die Christene, van wie 29 vroue, vrees dat die imam se besoek aggressie van ander Islamitiese gevangenes tot gevolg kan hê. Gesprekke oor geloofsake kan Moslemgevangenes aanhits tot geweld en aanvalle teen Christene.
‘Hoekom wil die Saoediese owerhede ons nie vrylaat nie?’ vra die Ethiopiese vrou. ‘Ons wil teruggaan na ons eie land en ons geloof in vryheid uitleef’.
Die ICC het Westerse regerings gevra om te protesteer teen die gevangehouding en openlike dwang tot bekering. ‘Ons roep elkeen op om protes aan te teken en die druk op Saoedi-Arabië om die Christene vry te laat, te intensiveer.’