José Dilson da Silva en Zeneide Moreira Novaes van die Servants Missionary Agency is op 6 November 2011 in hegtenis geneem op beskuldiging van mensehandel en kindermisbruik. Die twee Brasiliaanse sendelinge neem deel aan die ‘Obadja Projek’ wat straatkinders, waarvan daar 400,000 in Senegal is, in Dakar help. Die sending organisasie van die Presbiteriaanse Kerk in Brasilië het egter laat weet dat die twee om godsdienstige redes gearresteer is en doen ʼn oproep om voorbidding vir die twee Christene.

Da Silva word in haglike omstandighede in ʼn oorvol, warm en insekgeïnfesteerde sel aangehou. Sy vrou en sy seuntjie mag hom twee keer per week tien minute lank besoek. Druk van die Brasiliaanse regering en ʼn besoek van ʼn Brasiliaanse senator kon tot dusver nie slaag om die vrylating van die twee sendelinge te bewerkstellig nie.

Da Silva het in Februarie vanjaar per brief laat weet dat sy gevangenisskap hom met ‘ ʼn nuwe publiek’ in aanraking gebring het. Hy praat met verwondering oor die bekering van talle van sy medegevangenes. Hy het die geleentheid gehad om honderde Bybels en evangelisasiepamflette uit te deel.

Hy sê verder dat dit lyk asof sy ondervraers oortuig begin raak van sy onskuld. Een van hulle sou selfs gesê het die predikant verdien ʼn medalje vir die werk wat onder die straatkinders doen. Intussen weerspieël die Senegalese pers egter ʼn alles behalwe gunstige openbare opinie, met berigte wat die twee sendelinge skilder as “duiwelse mense, gehaat deur die hele volk”. Negentig persent van die ongeveer 13 miljoen Senegalese is Islamities.