In Filippense 4:7 lees ons 'n merkwaardige troosvolle woord: "… die vrede van God … sal wag hou oor julle gedagtes in Jesus Christus".

Onder gedagtes moet ons ver­staan 'n innerlike skeppinggegewen­heid wat ons lewe heilsaam kan vul of skrikwekkende resultate kan lewer. Ons kan ook sê: Ons ge­dagtes is die vertoonvenster of luidspreker van ons hart. Jou ge­dagtes verraai wie en wat jy is om­dat ons gedagtes deur ons persoonlikheid en karakter geskep word.

Die verskrikking van gedagtes⤒🔗

Omdat die mensdom in sonde ge­val het en die versinsels van sy hart daardeur net sleg geword het (Genesis 6, 8), is dit te begryp dat ook ons gedagtes 'n bose mag in ons geword het. In Filippense 4:7 is dit dui­delik dat ons gedagtes 'n vyand van die mens geword het wat hom geweldig kan terroriseer en folter. In die Bybel het ons 'n voorbeeld in Saul, wie se gedag­tes hom verskrik het sodat Dawid vir hom op die harp moes speel (1 Samuel 16:4). Ons het ook die voorbeeld van koning Ahasvéros (Ester 6:1) van wie die slaap gewyk het vanweë sy gedagtes sodat hulle vir hom uit die kronieke moes lees.

Die negatiewe krag en invloed van ons gedagtes is ook baie goed bekend uit die alledaagse lewe. Mense ontvang elektriese brein­selvernietigingskokke om folteren­de gedagtes te vernietig; ander ondergaan 'n chemohipnose om onverdringbare gedagtes weg te was; ander vlug na verdowingsmiddele of verplaas hulle na nuwe situasies en plekke of probeer doodeenvoudig hul gedagtes wegwerk. Ons ken die angs, vre­se, pyn waarmee ons gedagtes ons kan aanval. Skuldkomplekse, gewetensdrang, selfverwyt, misha­ging en depressie is maar 'n paar bekende woorde wat daagliks ge­lees word. Die geweldige gevolge word daagliks in die koerante deurgegee.

Die beheersing van gedagtes←⤒🔗

God, onse Vader, het egter deur Jesus Christus en die Heilige Gees aan ons 'n geskenk gegee om ons verkeerde en vyandiggesinde ge­dagtes nie slegs te verdring nie, maar te oorwin. God het met ons herskepping aan ons 'n ander mag en krag gegee waarmee ons ons gedagtes kan rig en lei sodat dit 'n heilryke en seënryke gevolge in ons lewe het.

Die geskenk waarvan ons spreek is die vrede van God soos Paulus dit noem in Efesiërs 4:7. Hierdie vrede van God is 'n verleng­stuk van die versoeningsvrede wat Christus tussen ons en God bewerk het. Die vrede van God in ons harte is die resultaat van ons geloof; van ons versoening ­en herskepping deur Christus. Die vrede van God is 'n rus vind en lewensvreugde by God in Christus. Die vrede in ons harte is selfs so sterk dat ons geen be­sorgdheid meer ervaar nie. Ons vrees niks meer nie. Nie 'n oorlog, nie die reispad nie, selfs nie 'n brandstapel nie. Die innerlike krag van angsloosheid is nie iets wat 'n mens kan aankweek of verwerf met breindissipline en allerlei metodes soos sommige meen nie. Nee dit is 'n geskenk, 'n gawe van God in Christus. Daarom noem Paulus dit: Die vrede van God in Jesus Christus. Hierdie gawe hou wag oor my gedagtes. Die 'wag­hou' is 'n militêre term vir iemand wat gewapen, paraat en gereed staan om te verdedig. So verdedig die vrede van God ons teen baie verkeerde en beangste gedagtes.

Omdat God hierdie groot geskenk in die lewe van sy kinders gegee het, is dit eerstens 'n merkteken van ons herskepping; 'n seël van ons verkiesing. Tweedens volg uit die gawe 'n opgawe; uit die geskenk 'n opdrag. Die opdrag noem Paulus in vs. 8:

Rig julle ge­heiligde gedagtes dan nou voluit op dit wat mooi, edel, goed, reg, opbouend is.

Saamgevat: bedink dit wat die lewe, lewe maak! Dit wat die lewe vreugde maak.

Natuurlik sal ons hierdie vrede van God wat ons gedagtes beheers nie hier op hierdie aarde volmaak hê nie. Daarvoor sondig ons nog te veel en vervul te veel sondige be­geertes ons hart (Jakobus 1:4 e.v.). Maar ons kan en moet ons gedag­tes beheers en op die weg van heiligmaking steeds meer aanpas by herskepping in Christus en die inwoning van die Gees in ons.