Bron: Die Kerkblad, 1989. 1 bladsye.

Gou om te Hoor, Stadig om te Praat...

Alreeds in die eerste eeu het Jako­bus 'n kostelike stukkie kerklike advies aan die gemeente en daarom aan elkeen van ons vandag gegee. ­'n Advies wat helaas met slegte gevolge nie nagekom word nie:

So dan, my geliefde broeders, elke mens moet gou wees om te hoor, stadig om te praat…

Hier het ons nou 'n lewenskuns, of liewer 'n gawe. Maar dit is 'n gawe waarin 'n mens geoefend moet wees, fiks moet wees. Dit vereis selfdissipline, nederigheid en beleefdheid. Twee ledemate moet uiters delikaat gehanteer word, naamlik die oor en die tong. Van die een (die oor) word verwag om altyd paraat te wees en soos 'n goeie atleet so vinnig soos moontlik weg te spring en met alle krag die volle afstand te nael – wees gou om te hoor!

Maar van die ander (die tong) word verwag om met groot tempe­ring en uiterste versigtigheid op die baan te kom en met beheerstheid (al is dit stadig) te beweeg – wees stadig om te praat!

Om reg te luister en reg te praat is 'n groot kuns. Let wel, die Skrif sê nie dat ons alleen moet luister en niks moet praat nie; ook nie dat ons slegs moet praat en niks moet luister nie.

Luister EN praat – goed luister en reg praat en elkeen op sy tyd.

Dag vir dag kry ons die oefen­geleenthede om fiks te wees in die luister-praat: Sondag in die kerk vir die gemeente om goed te luister en vir die dominee om reg te 'praat', in ons vergaderings, aan die eettafel, in die skool, op die sportveld, in die kerk, in die politiek…

Jakobus het dit goed raakgesien: as hierdie advies van die 'goed luister' en die 'reg praat' maar tog opgevolg word, dan sal die mens­dom 'n stroom ellendes gespaar bly. Met nadruk sê hy dat elke mens dit moet doen: die kerklike ampsdraer, die huisvrou, die student, die kabi­netsminister, die radio-omroeper, die skeidsregter ens.

As ons geleer het om goed te luister en reg te praat, dan kom die baie gevaarlike ding wat deur 'n lui oor en 'n haastige tong veroorsaak word, ook makliker reg – Jakobus se tweede advies – ­"wees stadig om toornig te word".

Ag, as ons tog maar eers net kan begin om na Jakobus se woord te luister. Dit is die moeite werd!