Bron: Die Kerkblad, 1985. 2 bladsye.

Jy behoort aan My!

Laat my toe om iets van die ryke en heerlike inhoud van God se genade­verbond aan u te verduidelik.

Die verbond vat die evangelie kort saam: Jy is van nature 'n kind van die duiwel, vyand van God, verlore, brandhout vir die hel – dit is al waarvoor 'n natuurlike mens deug. Jy is 'n voorwerp van God se toorn, en daar is niks in jou op grond waarop God enige behae in jou moet skep of jou genadig moet wees nie.

En tog… het God jou liefgehad met 'n ewige liefde! Nie omdat Hy jou sonde, jou ingebore afkeer en vyandskap teen Hom sommer oor die hoof gesien het nie – Hy is nie daardie soort regter nie – maar omdat sy Seun die straf in jou plek gedra het, en deur die kruis en die dood en die hel gegaan het – sodat jy gedoop kon word!

En nou sê God met jou doop aan jou: "Jy behoort aan My! Ek maak aanspraak op jou! Ek sit my merk op jou – soos Ek in die Ou Testa­ment my merk van die besnydenis op my volk gesit het".

"Die duiwel en die hel en die sonde het geen reg of aanspraak meer op jou nie. Ek, jou Here wat my Seun gestuur het om jou straf te dra, Ek roep jou tot die omhelsing van my liefde".

"Ek het 'n verbond met jou ouers gemaak en hulle belowe Ek sal hulle oortredings vergewe en aan hulle sondes nie meer dink nie (Jeremia 31:34! Jesaja 59:20-21! Handelinge 2:38-39!) Dit is my verbond met jou ouers, en dit loop deur na jou: Ek wil jou God wees! Jy moet my kind wees!"

"Luister na My, Ek praat met jou in my Woord en in die prediking daarvan, intiem, persoonlik, van hart tot hart".

Hoor jy die stem van jou Vader? Dis 'n egte Vader, 'n sterk Vader, 'n liefdevolle Vader. Hy is nie ver van jou af nie, Hy gee sy Heilige Gees om in jou hart te woon.

Ek onthou nog hoe ek as kind, wanneer ek in die hospitaal gelê het of wanneer my vader lank van die huis af weg was, met verwagting na die klank van die stem van my vader uitgesien het… en dan die ruk van blydskap as ek sy stem in die gang hoor. Hoe sal ek dit ooit kan vergeet?

Maar jy mag die stem van jou hemelse Vader hoor, wat soveel groter, soveel oneindig groter en volmaakter en sterker en meer lief­devol is, wat jou nooit teleurstel nie. Hy is nader as wat 'n aardse vader ooit kan wees.

Dit is wat die verbond is: Hy wil met jou so intiem omgaan; Hy wil met jou praat en jou sy wil leer ken in die Bybel.

Hy wil ook na jou luister; Hy wil hê jy moet met Hom praat – dis die eerste ding wat Hy van jou verwag: jy moet bid. Hy wil nie daarsonder klaarkom nie; Hy het soveel daarvoor oorgehad dat Hy sy geliefde goddelike Seun daarvoor na die kruis gestuur het.

Jy hoef nie welsprekend of mooi te praat nie. Jy as pa wil ook nie hê jou kind moet met 'n aangeleerde rympie in hoe woorde of in 'n spe­siale, "heilige" dreunstem met jou praat nie; jy wil maar net hê hy moet spontaan sy kinderhart vir jou oopmaak.

Dit is die verbond. Dit is die belof­te wat die doop verseël: 'n grote, heilige God wil 'n intieme, persoon­like gemeenskap van liefde hê met 'n verlore sondaar soos ek.

En dit is wat jou doop beteken: dit bevestig God se belofte met 'n teken wat wys na die dood van Christus. Dit wys nie na iets wat jy gedoen het of moet doen nie, dit wys na wat Christus vir jou gedoen het:

Laat julle doop want die belofte van die verbond kom aan julle toe en aan julle kinders!

Dit is ook presies wat die besnyde­nis in die ou verbond beteken het. Ons lees in Romeine 4:11

Abraham het die besnydenis as teken ontvang. Dit is 'n seël wat bewys dat God hom vrygespreek het omdat hy geglo het toe hy nog onbesnede was.

Soos die doop dui die besnydenis op God se vryspraak, wat ook vir Abraham alleen op die offer van Christus kon rus.

Die doop bevestig vir u God se be­lofte van Christus en al sy volheid.

Wat wil jy meer hê as dit? Wat wil jy meer hê as Christus en al sy ryk­domme? Wat kan 'n herdoop, of 'n tweede of derde of honderdste doop daaraan toevoeg.

Wat kan 'n herdoop jou meer gee as Christus?

Wat kan 'n herdoop jou gee wat jy nie reeds met jou eerste doop ont­vang het nie? As die belofte van God ook vir die kinders is, en die doop bevestig niks meer en niks minder as daardie belofte nie, dan is die doop tog ook vir die kinders bedoel.

Wat beteken 'n herdoop dan anders as dat jy God se eerste seël op sy dokument bevraagteken en 'n ander seël vra?