Bron: Die Kerkblad, 1958. 2 bladsye.

Wat is ʼn Sinode?

Wat is 'n Sinode en wat doen die mense wat daar is? Dit is seker 'n belangrike vergadering, want julle het al gehoor dat so 'n Sinode elke drie jaar vergader, en dan duur dit omtrent 2 weke!

Nie hoogste liggaam nie🔗

Hoewel sommiges dalk kan dink dat 'n Sinode die hoogste liggaam in ons kerklike lewe is, is dit nie waar nie. Ons noem dit nie die hoogste vergadering nie, maar 'n meerdere vergadering. Daarmee bedoel ons dat dit 'n vergadering of byeenkoms van meer kerke of meer gemeentes is (onthou tog dat die woorde kerk en gemeente presies dieselfde beteken). Elke kerk of gemeente word daar verteenwoordig.

Wie is daar teenwoordig?🔗

Die partikuliere (of streek) Sinodes wat gewoonlik 2 maande voor die Nasionale Sinode vergader, stuur mense daarheen. Hulle vaardig 'n aantal predikante en ouderlinge daarheen af. Dit moet predikante en ouderlinge wees wat daarheen gestuur word, want dit is die men­se wat mos bekend is as regeer­ders. Hulle dien in die diens (of amp) van die regering in die kerke.

In 'n Sinode is die afgevaardigdes altyd besig om te regeer, want hulle moet besluit wat die beste vir elke gemeente is, wat gemeentes behoort te sing, hoe predikante opgelei moet word, hoe die eredienste gehou moet word en baie ander sake.

Tydelik van aard🔗

Net soos die ander meerdere ver­gaderings — soos 'n Klassis, 'n Partikuliere Sinode en die Algemene Sinode — is 'n Nasionale Sinode 'n vergadering wat opge­roep of byeen geroep word om slegs bepaalde sake te behandel en af te handel. 'n Sinode is an­ders as 'n kerkraadsvergadering. 'n Kerkraad is 'n liggaam wat altyd bly voortbestaan. Julie weet self dat die ouderlinge en diakens en predikant die kerkraad vorm en dat hulle gewoonlik elke maand vergader. Verder kom hulle ook elke Sondag voor die erediens byeen. 'n Sinode is anders. Dit is nie 'n liggaam wat altyd bly voort­bestaan nie. As die werk afgehan­del is, ontbind die vergadering en gaan die predikante en ouderlinge weer terug na hulle gemeentes toe.

Bindende besluite🔗

As 'n Sinode verby is, staan daar altyd heelwat besluite wat hulle geneem het. Dit is besluite ter wil­le van elke gemeente en elke lid­maat. Dit is besluite wat uitgevoer moet word en wat nie sommer maar geïgnoreer kan word nie. Daarom noem ons dit bindende besluite. Elke lidmaat of gemeente is gebonde en verplig om dit te gehoorsaam. As iemand daarmee verskil dan moet hy dit vir die vol­gende Sinode gaan sê, en hy moet uit die Bybel en uit die bely­denis gaan aantoon dat dit ver­keerd is.

Weet julle waarom 'n Sinode so 'n belangrike vergadering is en waarom sy besluite bindend is?

Dit is omdat alle besluite wat daar geneem word, besluite is wat ge­grond of direk in lyn met die Woord van God en met die bely­denis moet wees. Die afgevaar­digdes op 'n Sinode kan nie sommer besluit wat hulle wil nie. Die hele bedoeling van die verga­dering is om saam met mekaar te probeer vasstel wat die Bybel en ons belydenis oor 'n bepaalde saak leer. Julle kan gerus in Han­delinge 15 lees hoe die afgevaardigdes van Antiogië en die apostels en ouderlinge van Jerusalem vas­gestel het wat die Ou Testament en wat Jesus self oor die besnyde­nis geleer het. Hulle het met die probleem geworstel of dit nog in die Nuwe Testamentiese tyd no­dig is om 'n gelowige te besny.

Uiteindelik het hulle besluit oor die saak, en dan lees ons in Han­delinge 15:28:

Want die Heilige Gees en ons het besluit.

Daarom moet elke Sinode kan sê: Die Heilige Gees en die Woord het ons gelei om so en so te besluit. In Handelinge 16:4 lees ons ver­der dat Paulus en sy mede apos­tels die besluite wat in Jerusalem geneem is vir die ander gemeentes weergegee het, en al die gemeen­tes was verplig om dit te gehoor­saam. Ons het dus van die Bybel­se tyd af voorbeelde en voorskrifte van die Here self oor iets wat ons vandag 'n Sinode noem.