1 bladsye. Vertaal deur Nic Grobler.

Christus, ons enigste Hoëpriester

Die groot werk van Christus as ons enigste Hoëpriester is om Homself as offer vir die sonde te bring. Hy is die Priester wat die offer bring én self die offer is.

Die offer vir die sonde is nie die enigste werk wat Christus as ons Priester doen nie. As dit so was, sou sy werk afgehandel wees. Maar Hebreërs 7:28 sê dat Hy vir ewig aangestel is. Net so min as wat die werk van die priester in die Ou Testament afgehandel was wanneer hy die brandoffer op die groot altaar in die tempel gebring het, is die werk van Christus afgehandel met sy enigste soenoffer. Só word Hy dan in Openbaring 1 geteken, verhoog en verheerlik en steeds besig met die werk van ʼn priester. Sy kleed, om die bors gegord met ʼn goue gordel, is ʼn priesterkleed.

Christus se werk as Hoë Priester gaan in die besonder in twee opsigte voort. Eerstens gaan dit voort in sy voorspraak vir sy volk by God. In die Ou Testament is dit gesimboliseer wanneer die priester met vuur van die groot altaar die tempel ingegaan het om wierook op die goue altaar wat voor die voorhangsel gestaan het, te offer. Die lieflike geur van die wierook wat in die teenwoordigheid van God opgegaan het, was die teken van die lieflike gebede van Christus wat, met ons gebede vermeng, in die teenwoordigheid van God opgaan, waar hulle aangeneem en verhoor word.

Omdat die wierook die voorspraak van Christus simboliseer, moes die priester die wierook met vuur van die groot altaar, waarop die versoeningsoffer pas gebring is, brand. Die wierook het die aanvaarbaarheid van die gebede van die volk van God afgebeeld, omdat die gebede deur die bemiddeling van Christus tot God self kom. Die kole van die brandofferaltaar is die afbeelding van die enigste rede waarom ons gebede aanvaarbaar is, te wete die offer van Christus.          

Die werk van Christus as Priester gaan ook voort in die seën wat Hy oor sy volk uitstort. Die uitstorting van die Gees en die seëninge van die Gees is die werk van Christus as ons hemelse Hoëpriester.

In die Ou Testament is dit gesimboliseer wanneer die priester met die offerwerk en die middelaarswerk klaar was, en die seën van die HERE wat só verkry is op die volk gelê het (Num. 6:22-27). Die priester het dit by die ingang van die tabernakel of die tempel gedoen waar hy die volk in die Naam van die Here geseën het (Luk. 1:22). Christus doen dit vanuit die hemelse heiligdom wanneer Hy ons in die naam van God seën.

Om dit te doen gaan Christus eers die hemel self in. Dit is in die Ou Testament gesimboliseer wanneer die hoëpriester, een maal per jaar, die allerheiligste ingegaan het en die bloed vir versoening na die versoendeksel voor God gebring het. Wanneer Christus vir ons in die teenwoordigheid van God verskyn (Heb. 9:24), bring Hy sy bloed voor God. Op grond hiervan gaan Hy voort om vir ons voorspraak te doen, en met die seën wat Hy steeds van God vir sy volk verkry.

Almal wat in Christus glo, het so ʼn Hoëpriester — die Een wat die volmaakte offer bring, wat die volmaakte voorspraak is en wat die seën van God vir hulle kan verkry. Moet op geen ander priester as Hom vertrou nie!