Ons vergeet soms dat Christus nie net ons groot Hoë Priester is, wat die een offer vir sonde gebring het nie, maar dat Hy ook ons Profeet en Koning is. Hierdie ampte is net so belangrik as sy priesterlike amp.

As Profeet is Hy die Een wat die Woord van God aan ons bring. Eerstens doen Hy dit deur die lewende Woord van God te wees (Joh. 1:1 e.v.). As die lewende Woord openbaar Hy God aan ons (Joh. 1:14; Joh. 14:9) —  al die genade, barmhartigheid en liefde van God, maar ook die heiligheid, geregtigheid en toorn van God.

Christus is ook ons profeet deur die Woord van God tot ons te spreek. Dit doen Hy deur die prediking van die evangelie. Deur die roeping en sending van getroue predikers laat Hy Homself aan sy volk hoor (Joh. 5:25; Joh. 10:27) sodat, al het hulle Hom nie gesien nie, hulle Hom liefhet en Hom gehoorsaam (Joh. 20:29). Een van die belangrikste waarhede in die Skrif aangaande die prediking is dít: dat God se volk deur die werk van die Heilige Gees in die  prediking, die stem van Christus hoor. Dit maak prediking die ware krag van God tot redding (Rom. 1:16) en daarom kom die geloof uit  die gehoor (Rom. 10:17).

Omdat Christus met so ʼn krag spreek, het ons nie ʼn ander profeet nodig nie, en mag ons ook nie ʼn ander naas Hom opsoek of volg nie. Hulle wat vandag sê dat hulle profete is en dat hulle die wil van God onfeilbaar spreek of openbaar, ontken die unieke profetiese amp van Christus, en word in sy teenwoordigheid beskaam. Voor die koms van Christus was ander profete nodig, maar noudat Hy hier is as die lewende en blywende Woord van God, kan daar geen ander wees nie.

Die werk van Christus as Profeet is so belangrik dat Moses reeds lank voor sy geboorte van sy koms vertel het (Deut. 18:15; Hand. 3:22-25). Oor die profetiese werk van Christus het Moses gesê: “na Hom moet julle luister volgens alles wat Hy met julle sal spreek” (Hand. 3:22).

 Die volk het nie altyd na Moses geluister en hom gehoorsaam nie, daarom praat Moses van ʼn beter profeet wat sal kom. Na Hom wat kom moet hulle luister. As die Seun van God praat Hy met soveel krag dat die sondaar nie anders kan as om te gehoorsaam wanneer Hy roep nie. Wanneer Hy tot geloof en bekering roep, skep sy kragtige stem die geloof en bekering in die harte van sy volk. Wanneer Hy spreek, hoor die dode die stem van die Seun van God en lewe (Joh. 5:25). Daarom het Moses gesê: “na Hom moet julle luister volgens alles wat Hy met julle sal spreek”.   

Sondaars is “dood” en hoor Christus nie voordat Hy met daardie krag tot hulle spreek nie, maar dit doen nie weg met die verantwoordelikheid van diegene wat in hulle sonde te niet gaan nie: “elke siel wat nie na dié Profeet luister nie, sal uit die volk uitgeroei word” (Hand. 3:23).

Ons kan Christus net hoor wanneer sy kragtige en skeppende woord in ons harte spreek. Ons moet Hom immers hoor, anders gaan ons te niet. As die Profeet eis Hy ons aandag. “Daarom moet ons des te meer ag gee op wat ons gehoor het, dat ons nie miskien wegdrywe nie” (Heb. 2:1).