1 bladsye. Vertaal deur Nic Grobler.

Christus se Volkome Menslike Natuur

Ons het aangewys dat daar vyf waarhede is wat in verband met Christus se menslike natuur geglo moet word: dat dit werklik, volkome, sondeloos, swak en sentraal in die lyn van die verbond is.

Nou kyk ons na die wonderlike waarheid dat die menslike natuur van Christus volkome is, wat beteken dat, toe Christus in ons vlees gebore is, Hy nie net met ʼn menslike liggaam gebore is nie. Hy het ook ʼn menslike siel of gees (Luk. 23:46; Joh. 12:27), ʼn menslike verstand (Filip. 2:5), ʼn wil (Joh. 6:38), ʼn hart (Matt. 11:29) en alle ander dinge wat by ons menslike natuur hoort.

Hy is nie half mens en half God nie, maar ten volle mens en ten volle God; tog was Hy net een Christus. Dit is die wonder, die geheimenis en die heerlikheid van sy vleeswording.

Hierdie waarheid is in die loop van die geskiedenis van die kerk ontken. Sommiges het die vleeswording probeer verklaar deur te sê dat Christus net ʼn menslike liggaam  het en dat sy goddelike natuur die plek geneem het van die menslike verstand of die menslike siel. In daardie ʼn geval sou Christus nie ʼn volkome menslike natuur hê nie, maar net ʼn deel daarvan. ʼn Analogie hiervan is dat Hy soos ʼn skepsel met die verstand van ʼn mens in die liggaam van ʼn dier sou wees.

Dit is ewenwel van die grootste belang dat ons glo dat Christus ʼn volkome menslike natuur  het. Ons verlossing hang daarvan af!

Christus moes elke deel van ons menslike natuur op Hom neem, want elke deel moes verlos word. Die Bybelse waarheid van totale bedorwenheid leer dat ons in alle opsigte verdorwe en bedorwe is.

Ons liggaam is vernederd (Filip. 3:21), ons siel is verlore (Matt. 16:26), ons wil is verkneg (Rom. 6:16) ons verstand is vleeslik, vol vyandskap teen God, sodat dit hom nie aan die wet van God kan onderwerp nie (Rom. 8:7,8) en ons hart is bedrieglik en bo alle dinge en  uiters verdorwe (Jer. 17:9). Daar is geen deel van ons menslike natuur wat goed is nie.

Daarom het Christus ons volledige menslike natuur op Hom geneem, sodat Hy daarin kon ly en vir ons in al ons lede versoening kon bewerk. Só het Hy ons, hart en verstand en siel en krag, van die heerskappy en mag van die sonde verlos en ons met alles wat ons het, diensknegte en kinders van die lewende God gemaak.

Christus is ʼn volkome Verlosser. Dank sy aan God vir Hom. Daar is waarlik niemand soos Hy nie.