Die ander besonderse boom wat God self in die tuin van Eden geplant het, was die boom van die lewe. Hierdie boom was ook van die grootste betekenis vir Adam en Eva.

Daar bestaan die vraag of dié boom self die krag gehad het om aardse lewe te skenk. Die woorde van God, toe hy Adam en Eva verhoed het om van die boom te eet, mag daarop dui, maar dit was nie die hoofsaaklike betekenis van dié boom nie.

 Die boom het aan Adam en Eva die waarheid voorgehou dat die lewe uit gehoorsaamheid aan God bestaan. Ook die wet getuig daarvan (Gal. 3:21) hoewel dit nie self lewe gee nie. Toe Adam en Eva ongehoorsaamheid gekies het, was die vir hulle onmoontlik om in die ware sin voort te “lewe”. Hulle moes sterwe en God het hulle die reg ontsê om van die boom van die lewe te eet.

Vir Adam en Eva het die boom van die lewe voorgehou, en dit is ook vir ons van die grootste betekenis, dat gehoorsaamheid nie alleen beteken om die bose na te laat nie, dit wil sê om nie te doen dit wat God verbied het nie. As dit so was sou die dronkaard wat ‘op die waterkar’ is maar wat nie bekeer is nie, in gehoorsaamheid aan God geleef het, terwyl hy dit inderwaarheid nie doen nie.

 Daar is altyd die positiewe kant van gehoorsaamheid, wat ons vroeër beskryf het as ‘ja’ sê vir God. Sonder daardie liefde tot God en die begeerte om Hom te behaag, is blote uitwendige liefde ʼn gruwel. Jesaja praat hiervan wanneer hy sê dat om ʼn offer te bring sonder liefde tot God in die oë van God nie anders is as om ʼn man dood te slaan of ʼn hond se nek te breek nie (Jes. 66:3). Paulus sê dieselfde, wanneer hy ons hieraan herinner: “alles wat nie uit die geloof is nie, is sonde (Rom. 14:23).

Hulle wat nie vir God ‘ja’ sê en Hom liefhet met hulle hele hart, hulle hele verstand, siel en krag nie, doen geen goed nie. Hulle oppervlakkige gehoorsaamheid aan die wet van God wys bloot dat hulle daardie wet ken, maar God nie ken en liefhet nie. Deur sulke “gehoorsaamheid’ maak hulle hul oordeel net groter. Ware gehoorsaamheid beteken om van die sonde weg te draai, maar ook om na God te draai met ons hele hart en met al ons kragte.

 In die nuwe skepping sal daar net die boom van die lewe wees (Openb. 22:2). Die boom van die kennis van goed en kwaad sal nie daar wees nie. Sonde en dood en die Satan sal ook nie daar wees nie, en ons gehoorsaamheid sal nie meer daarin bestaan om vir hulle ʼnee’ te sê nie. Ons gehoorsaamheid sal enkel en alleen liefdesdiens aan God self wees.

Die boom van die lewe beteken daarom vir ons Christus. Hy is nie alleen die bron van ons ewige lewe, soos die eerste boom bedoel was as bron van die lewe vir Adam en Eva nie, maar Hy is ook dié Een in wie ons gehoorsaamheid aan God volmaak is. Hy is die een wat in ons plek vir God ‘ja’ gesê het, selfs tot die dood toe. Hy is die Een uit wie ons lewe en wat ons siele tot die ewige lewe voed, sodat ons ook vir God ‘ja’ kan sê met alles wat ons is en het. Wanneer ons in die nuwe skepping uit Hom lewe en ons vreugde in Hom vind, sal dit onmoontlik wees om vir God ʼnee’ te sê.

Is dit nie wonderlik nie?