1 bladsye. Vertaal deur Nic Grobler.

Die Drie Ampte van Christus

Wanneer ons van die drie ampte van Christus praat, verwys ons na Hom as ons hoogste Profeet (Hand. 3:22-26), ons enigste Hoëpriester (Heb. 7:24-28) en ons ewige Koning (Openb. 7:14).

Met hierdie drie ampte is Christus uniek in die Skrif. Niemand anders, behalwe Melgisedek, het al drie ampte beklee nie (Heb. 7). In die tyd van die konings was dit vir die konings van Israel en Juda verbode om as konings én priesters te dien. Toe Ussía, een van die konings van Juda, probeer het om as koning die funksie van ʼn priester te verrig, is hy met melaatsheid getref (2 Kron. 26:16-21; lees ook 1 Sam. 13:8-14).

ʼn Man kon, soos Samuel, ʼn profeet én ʼn priester wees of, soos Dawid, ʼn koning én ʼn profeet, maar hy kon nie koning én priester wees nie. Net Melgisedek het albei ampte beklee, en hy was ʼn unieke voorteken van Christus. Daar is niemand soos Christus nie.

Omdat daar niemand soos Christus is nie, mag ons niemand naas Hom hê nie — geen aardse priester of profeet, en geen ander koning as Christus nie. Die aansprake van almal wat vandag beweer dat hulle profete of priesters of opperheersers in die kerk van Jesus Christus is, word deur Hom beskaam. Die kerk het geen ander Hoof as Christus nie, geen ander profeet as die lewende Woord van God nie en geen ander priester nie as net die genadige Seun van God wat Homself as offer vir die sonde van sy volk gebring het. Oor hierdie dinge sal ons later meer sê.

Voordat ons na die profetiese, priesterlike en koninklike ampte kyk, moet ons egter verstaan wat ʼn amp is. ʼn Amp is eerstens ʼn dienende posisie. In die skrif, en in die besonder in die profesie van Jesaja, word Christus met sy ampte vereenselwig met die Kneg van Jehova (Jes. 52:13; Jes. 53:11). Hy kom as Kneg van Jehova om die wil en werk van God uit te voer (Luk. 2:49; Joh. 4:34).

ʼn Amp is ook ʼn gesagsposisie. In sy drie ampte het Christus alle mag in die hemel en op aarde (Matt. 28:18). Die woorde wat Hy as Profeet spreek, het sulke gesag dat diegene wat dit nie hoor nie te niet sal gaan. As Koning is hy oppermagtig in sy heerskappy oor alle dinge. Sy werk as Priester, waardeur Hy sy offer bring en ons salig maak, is heilswerk, want God het aan Hom die gesag gegee om die één soenoffer vir die sonde te bring en om almal wat God aan Hom gegee het te seën met die volle rykdom van die saligheid.

ʼn Amp is, ten slotte, ook ʼn middelaarsposisie. As Profeet, Priester en Koning is Christus ons Middelaar. Hy “staan tussen” God en ons, nie alleen om ʼn priesterlike offer, wat aan die geregtigheid van God voldoen, vir die sonde te bring nie, maar ook om as Profeet die Woord van God na ons te bring en om in die naam van God as soewereine Koning oor ons te regeer.

Sy naam, Christus, dieselfde naam as die Ou Testamentiese naam Messias, gee blyk van al hierdie dinge. Dié naam beteken “gesalfde” en verwys daarna dat God die Vader Christus deur die Heilige Gees gesalf en aangestel het, om ons Profeet, Priester en Koning te wees.

Daar is waarlik geen ander soos Hy nie. Laat ons dan na geen ander luister nie, voor geen ander buig nie en op geen ander offer vertrou as syne nie. Dán kan ons met waarheid sê dat Hy vir ons die Christus, die Seun van die lewende God is.