Die Here Bewaar
Die Here Bewaar
Die lewe is nie 'n reguit en maklike pad nie. Dit kan eerder met 'n smal, kronkelende voetpad vergelyk word, want elke dag, elke week en elke jaar bring jou dikwels voor probleme en uitdagings te staan. En dan vra jy ook die vraag wat die digter van Psalm 121 gevra het: Waar sal my hulp vandaan kom? As gelowiges ken ons ons menslike swakhede en weet ons dat ons sonder hulp die voetpad van die lewe nie kan aanpak nie.
Die krag van ons hulp⤒🔗
Die digter van Psalm 121 staan voor 'n bepaalde probleem, maar hy kyk verby sy probleem en omstandighede en hy sien die Here raak. Hy besef opnuut weer dat sy hulp van die Here is wat hemel en aarde gemaak het. Die Here kan help en bewaar, want Hy is die Here wat alles gemaak het. Hy is 'n almagtige Bewaarder wat in staat is om te help, maar dan moet jy ook sy hulp soek en jou gelowig onder sy beskerming stel. En as jy eers jou vertroue op die Here gerig het, dan val jy nie weer in jou bekommernis vas nie.
So rig die digter sy geloofsoë op die Here as Bewaarder en in die res van Psalm 121 is daar by die digter nie die geringste teken van benoudheid nie – slegs rustige en kinderlike vertroue.
Hoe bewaar die Here←⤒🔗
In hierdie pragtige psalm vertel die digter ook hóé die Here bewaar.
Hy bewaar onophoudelik, want ons Bewaarder kan nie sluimer of slaap nie. Hy is 'n lewende God wat altyd waaksaam is.
Die Here bewaar ook omvattend, want niks is vir Hom onbelangrik nie. Sy bewaring omhels die groot én die klein dinge van die daaglikse lewe. Hy bewaar jou dat jou voet nie struikel nie. Hy bewaar jou vir elke onheil – of jy weg van die huis is (jou uitgang) en of jy tuis is (jou ingang).
Die Here bewaar ook eg persoonlik. Hy ken jou en daarom is die Here ook jóú Bewaarder. In die psalm word die persoonlike nabyheid en sorg van die Here beklemtoon as die Here die skaduwee aan jou regterhand genoem word.
Die Here se bewaring is ook heerlik verkwikkend. Soos 'n verkwikkende wolk is die Here se bewaring oor jou dat die son jou bedags nie sal steek nie.
As sy kinders sal ons hierdie jaar nog probleme, benoudheid en kommer ervaar. Maar in en deur dit alles sal die Here jou bewaar dat geen werklike kwaad jou sal tref nie. Jy sal aanvegtinge ervaar, maar nooit sal dit jou van die liefde van God skei nie. Jy sal die duiwel ervaar, maar hy kan jou nie uit die hand van Christus losruk nie.