William Barclay gee in sy The Daily Study Bible 'n verklaring oor die wyse manne/sterrekykers uit die Ooste. Dit gee ek in hooftrekke weer.

Hierdie manne word ook Magi genoem. Aangaande hulle het "die vader van die geskiedskrywing" Herodotos (484 v.C.) enkele mededelinge.

Oorspronklik was hulle 'n stam van die Meders wat deel van die Persiese Ryk uitgemaak het. Hierdie stam het eers 'n vrug­telose poging aangewend om die Persiese mag in die hande van die Meders oorgeplaas te kry. Daarna het die Magi hulle strewe na mag laat vaar en 'n stam van priesters ge­word, omtrent soos die Le­viete in Israel. Uiteindelik het hulle die onderwysers en raadgewers van die Perse en hulle konings geword. In Persië mag geen offerandes plaasgevind het as daar nie van die Magi teenwoordig was nie. Hulle was die erkende heilige en wyse manne. Hulle was onderrig in filo­sofie, medisyne en natuur­wetenskappe en veral in sterrewiggelary.

In daardie tyd het die vaste stand en gang van die sterre vir hulle 'n vas­tigheid in die goddelike plan en beheer beteken. Sodra daar egter 'n bui­tengewone sterreversky­ning was, het hulle dit gesien as 'n goddelike voorteken van iets buitenge­woon wat gaan gebeur.

Ons weet nie watter hel­der "ster" daardie Magi (sterrekykers — Matteus 2:1) gesien het nie. Daar is meer as een gissing.

Omtrent 11 jaar v.C. het die komeet (later na Hal­ley genoem) helder sig­baar in die lug verskyn. Omtrent 7 jaar v.C. was daar 'n helder saamvloei­ing van die lig van Satur­nus en Jupiter. In die jare 5 tot 2 v.C. was daar op die eerste dag van die Egip­tiese maand Mesori, net voor die opkoms van die son, 'n buitengewone hel­der skynsel van Sirius (Hondster) sigbaar. Die naam Mesori beteken "die geboorte van 'n prins" — en vir die destydse sterre­wiggelaars sou so 'n ster ongetwyfeld die geboorte van 'n groot koning bete­ken het.

Ons weet nie watter "ster" die Magi gesien het nie, maar wat hulle gesien het, was vir hulle 'n voorbode van 'n buitegewone koning van die Jode.

Dit lyk iets buitenge­woons dat daardie manne uit die ooste op reis gaan op soek na "die koning van die Jode". Maar die won­derlikste is dat juis in die tyd toe Jesus gebore is, daar onverklaarbaar wêreldwyd die verwagting van 'n komende koning was. Selfs die Romeinse historici Seutonius en Ta­situs (54 v.C.), asook die Joodse geskiedskrywer Josefus (37 n.C.) het in hulle geskrifte daarvan melding gemaak.

Die vermelding aan­gaande die wyse manne/Magi uit die Ooste en die "ster" by die geboorteplek van Jesus is dus nie slegs 'n mooi legende nie. Dit is presies die vervulling van 'n al sterker groeiende verwagting van 'n buiten­gewone persoon by die Verbondsvolk en volke wê­reldwyd. Lees onder meer Deuteronomium 18:15 e.v.; Numeri 24:17, Romeine 8:19 e.v.