Lees: Psalm 77

Gelowiges kom ook in nood. Daarvan is die Bybel vol. Dink vir 'n oomblik maar aan die nood van Job; Dawid by tye; en die profete en apostels wat onder groot beproe­winge en verdrukking moes werk.

'n Kind van die Here ervaar ook swaarkry. Die eerste elf verse van Psalm 77 beskryf dit so treffend en dan trek dit saam in die noodkreet van vers 8: "Sal die Here vir altyd ver­stoot en nooit weer genade betoon nie?"

Hierdie noodkreet is nie die taal van 'n ongelowige nie. Dit kom uit die hart van iemand wat die Here ken.

Ons kan nie vasstel wat die aard van die nood is nie. Waarskynlik was dit in 'n tyd waarin Israel (vs. 16 — Jakob en Josef) in groot ver­drukking was. Die saak is egter eenvoudig. Hier het ons 'n gelowige mens wat nood het en wat sy nood voor God bekla. So erg dat hy selfs wonder of daar 'n einde gekom het aan God se trou.

Noodkrete⤒🔗

Dit is 'n voorbeeld van elkeen van ons. Ons ken die noodkreet. Ons ken die wanhoopaanklag teen God! Ons ken die taal van die eerste 11 verse tog so goed. Dit is dikwels ons nood­kreet by dood en siekte; by misluk­king en teenslae; by swaarkry en spanning.

Soos die ongelowige ken ons dus ook die noodkreet. Maar daar is 'n groot verskil. Die gelowige steek nie vas in sy eie nood nie. Hy gaan lê nie in sak en as en gee geestelike boedel oor nie!

Hy kyk verby sy nood.

Na God.

Nadenke oor God se dade←⤒🔗

Die tweede deel van Psalm 77 (vs. 13-­21) omskryf die gelowige se reaksie op nood. Dit is nadenke oor God se dade.

Die Psalm kry 'n nuwe toon soos uitgedruk in vs. 13: "Ek wil nadink oor al u werk en oor u dade peins". Die kind van die Here kyk weg van homself na God: veral na die dade van God in die verlede.

Dan sien hy:

• God se magtige skeppingsdaad;
• God wat alles regeer en onderhou;
• God wat kragtig sy verlossing deurvoer en sy verbondsvolk be­waar.

Teenoor die grootheid van God se werke en sy genade oor ons vervaag die tydelike nood en swaarkry.

Die gelowige het insig←⤒🔗

'n Gelowige het dus perspektief op sy nood. Ons kan ook terugkyk op die verlossing in Christus. Ons kan ons verheug in die Heilige Gees wat steeds werk. Ons kan ons verseker van die lewende God se aktiewe hand in die wêreld. En in ons per­soonlike lewe.

U sien: die verlossing is nie net 'n groot abstrakte geestelike saak nie.

Verlossing vind konkreet in ons lewe plaas. God maak ons nie net los van die sonde slawerny nie. Hy maak ons los van die klein daaglikse kwellinge.

Trane droog Hy op sy tyd. Ons sien dikwels dat terwyl ons treur en tob alles ligter word. Die skynbaar onoplosbare probleem vervlugtig. En dan weet ons: "Die Here lei sy kudde…" (vs. 21).

Wat leer die Here ons in Psalm 77? Eerstens: Ons sal noodkrete hê. Ons sal wantrouig vra na God se trou. Ons sal ook sê: Geld sy beloftes dan nie meer nie!

Maar dan leer die Psalm ons verder:

Kyk na die dade van God. Nie net die groot dade wat Hy deur die geskiedenis gedoen het nie. Kyk na sy dade in jou verlede.

Baie van jou trane het Hy afge­droog. Jou bewende hande het Hy dikwels stilgemaak. Jou beangste gesig het Hy weer laat lag.

Dink na oor God se werk en jou noodkrete sal stil word.